काठमाडौं २५ जेठ–सर्वोच्च अदालतले कायम मुकायम प्रधानन्यायाधीश गोपाल पराजुलीबिरुद्ध दायर गरिएको रिट खारेज गरेको छ ।
न्यायाधीश पुरुषोत्तम भण्डारीको एकल इजलासले मागदावी नपुगेको भन्दै बिहीवार पराजुली विरुद्धको रिट खारेज गरेको हो । पराजुलीविरुद्ध रिट दायर गरेका अधिवक्ता विकास गिरीले आफूले रिटमा गरेको दावी नपुग्ने भन्दै रिट खारेज गर्न माग गर्दै निवेदन दिएका थिए ।
विश्वविद्यालय, निजामति कितावखाना र जिल्ला प्रशासन कार्यालयमा भिडाउदा पराजुलीको नागरिकता र शैक्षिक प्रमाणपत्रको मिति कतिपय मिडियाले प्रचार गरेजस्तो फरक नपरेको भन्दै गिरीले रिट खारेजीको निवेदन दिएका थिए ।
प्रमाणपत्र ट्याली गर्दा पराजुलीको प्रमाणपत्र शंकास्पद वा अमिल्दो नरहेको र तथ्यहरु तोडमोड भएको अबस्था नभेटिएको गिरीले निवेदनमा उल्लेख गरेका छन् ।
पराजुलीले बुधवारदेखि सर्वोच्चमा कामु प्रधानन्याधीशको कार्यभार सम्हालेका छन् । न्यायपरिषदले संवैधानिक परिषद्मा औपचारिक सिफारिश गरेपछि सर्वोच्चका वरिष्ठतम् न्यायाधीश पराजुली सर्वोच्चको प्रधानन्यायाधीश बन्ने छन् ।
