२८ जेठ २०८३, बिहीबार
नेपाली कांग्रेसका वरिष्ठ नेता रामचन्द्र पौडल समूहको अनौपचारिक बैठक महामन्त्री शशांक कोइरालाको घरमा बसेको छ ।
कोइरालाको महाराजगञ्जस्थित घरमा बसेको बैठकमा आगामी महाधिवेशनका लागि साझा उम्मेदवार तय गर्ने विषयमा समेत सामान्य छलफल भएको छ ।
बैठकमा वरिष्ठ नेता रामचन्द्र पौडेल, महामन्त्री शशांक कोइराला, केन्द्रीय सदस्यहरु डा. रामशरण महत, डा. शेखर कोइराला, डा. मीनेन्द्र रिजाल, प्रकाशमान सिंह, अर्जुन नरसिंह केसीलगायतको सहभागिता थियो ।
बैठकमा क्रियाशील सदस्यता छानबिन समिति सदस्य प्रदीप पौडेललाई बोलाएर नेताहरूले सदस्यता छानबिनको विषयमा भइरहेको कामको बारेमा जानकारी लिएका थिए ।
बैठकमा सहभागी नेता मीनेन्द्र रिजालले लोकान्तरसँग भने, ‘महाधिवेशनसँग सम्बन्धित समसामयिक विषयमा छलफल गर्न अनौपचारिक रूपमा जुटेका थियौँ । सदस्यता छानबिनको सम्बन्धमा भएको कामबारे छलफल भएको छ ।’
कांग्रेसको संस्थापन इतर समूहको बैठकमा बोलाइएकाले आफू पनि सहभागी भएको सदस्यता छानविन समिति सदस्य एवं प्रवक्ता प्रदीप पौडेलले बताए ।
‘उहाँहरूले क्रियाशील सदस्यता छानबिनको विषयमा भइरहेको कामको बारेमा केही चासो राख्नु भएको थियो । उहाँहरूको जिज्ञासाको जवाफ दिएर फर्किएको हुँ,’ पौडेलले भने ।
बैठकले सरकारमा पार्टी सभापति एवं प्रधानमन्त्री शेरबहादुर देउवासँग सुजाता कोइराला, शशांक कोइराला र प्रकाशमान सिंहमध्ये एक जनालाई उपप्रधानमन्त्री बनाउन माग गर्ने बारेमा पनि छलफल भएको बुझिएको छ ।
सुजाता कोइरालाले त यसअघि नै पार्टी सभापति देउवालाई फोन गरेरै मन्त्री बनाउन आग्रह गरेको भन्दै देउवाले आफ्ना निकटस्थहरूलाई जानकारी गराएका थिए ।
तर, बैठकमा सहभागी भएका नेता रिजालले भने कसैलाई मन्त्री बनाइदिन माग गर्ने बारेमा छलफल नभएको दाबी गरे । ‘हामीले मन्त्रीको नाम पठाउन हामीसँग मन्त्री माग गरिएको छ र ?,’ उनले भने, ‘आसन्न महाधिवेशनको समसामयिक विषयमा मात्रै छलफल गरेका हौँ ।’
