०२ असार २०८३, मंगलबार
तनहुँको म्याग्दे गाउँपालिका–६ स्थित अकलादेवी मन्दिरको मूर्ति सोमवार राति चोरी भएको छ ।
जिल्ला प्रहरी कार्यालयका प्रहरी नायब उपरीक्षक युवराज तिमिल्सिनाले कुकुर सहितको टोलीले मंगलवार बिहानदेखि अनुसन्धान थालिसकेको जानकारी दिए ।
उनका अनुसार मन्दिरमा भक्तजनले चढाएका ३/४ वटा मूर्ति चोरी भएको छ । मन्दिरको मुख्य मूर्ति भने सुरक्षित रहेको उनले बताए ।
‘मन्दिरमा पनि तोडफोड भएको छ,’ उनले भने, ‘अनुसन्धानबाट सबै कुरा पत्ता लगाउने काम थालेका छौं ।’
पृथ्वी राजमार्गसँगै जोडिएको मन्दिर हिन्दू धर्मावलम्बीको पवित्र धार्मिकस्थल हो । यहाँ पूजाआजा गर्नका लागि छिमेकी जिल्लाबाट पनि भक्तजन आउने गर्दछन् ।
