२१ जेठ २०८३, बिहीबार
अमेरिकाका राष्ट्रपति जो बाइडनका प्रमुख चिकित्सा सल्लाहकार डा एन्टोनी फाउचीले कोरोनाभाइरसको डेल्टा भेरिएन्ट द्रुत गतिमा अघि बढिरहेको र यसपछि आउने भेरिएन्ट झनै खतरनाक हुने बताएका छन् ।
उनले भने, ‘अमेरिकामा अहिले कोभिड–१९ कोे वृद्धि यही गतिमा अघि बढ्ने हो भने भाइरसको यसभन्दा खतरनाक स्ट्रेनको सामना गर्नुपर्ने हुन्छ । त्यस स्ट्रेनले अहिलेका खोपहरूलाई पनि छल्नेछ ।’
भाइरसविरुद्धको खोप नलगाएका करोडौं अमेरिकीहरूलाई तत्कालै खोप लगाउनुको महत्त्व फाउचीको टिप्पणीले उजागर गरेको छ ।
धेरै मानिसले खोप नलगाएकाले गर्दा अमेरिका भयावह स्थितिमा फस्न लागेको फाउचीको भनाइ छ ।
फाउचीका अनुसार, ९ करोड ३० लाख मानिसले खोप लगाउनका लागि योग्यता भए पनि खोप नलगाएकाले भाइरस संक्रमण बढिरहेको छ ।
उनले भने, ‘केही महिनाअघि दिनको १० हजार केस आइरहेका थिए । अब केही समयमा दैनिक एक लाखदेखि दुई लाख केस देखिनेछन् ।’
