२१ जेठ २०८३, बिहीबार
नेकपा एमालेको माधव नेपाल पक्षले पार्टी एकताका लागि अध्यक्ष केपी शर्मा ओलीले आत्मालोचनासहित माफी माग्नुपर्ने शर्त राखेको छ ।
दुई पटकसम्म प्रतिनिधि सभा विघटन गरेर संविधानमाथि घात गरेकाले ओलीले जनतासँग माफी माग्नुपर्ने नेपाल पक्षको माग छ ।
काठमाडौंमा बिहीवार र शुक्रवार बसेको माधव नेपाल पक्षको केन्द्रीय कमिटी बैठकमा बहुसंख्यक केन्द्रीय सदस्यहरूले ओलीले आत्मलोचना गरे मात्र एकता हुने बताएका हुन् । सदस्यहरूले पार्टी एकता सम्मानजनक हुनुपर्ने धारणा राखेका थिए ।
‘पार्टी एकता सम्मानजनक हुनुपर्ने विषयमा केन्द्रीय सदस्यहरूको एक स्वर छ,’ केन्द्रीय सदस्य चुडामणि जंगलीले लोकान्तरसँग भने, ‘पटक–पटक असंवैधानिक ढंगले प्रतिनिधि सभा विघटन गरेर संविधान र जनताप्रति घात गरेकाले आत्मालोचनासहित माफी माग्नु पर्छ ।’
बैठकले यही प्रस्ताव पारित गर्ने सदस्य विश्वकर्माले दाबी गरे ।
ओलीले माफी नमागे पार्टीले भए पनि माफी माग्नुपर्ने धारणा धेरैले राखेको जंगलीले बताए । बिहीवार र शुक्रवार गरी ५५ जना केन्द्रीय सदस्यले धारणा राखेका थिए ।
केन्द्रीय कमिटी बैठक रोकेर स्थायी कमिटी बैठक बसिरहेको अर्का सदस्य मेटमणि चौधरीले जानकारी दिए । स्थायी कमिटीले प्रस्ताव तयार गरेर केन्द्रीय समितिमा लैजाने तयारी छ ।
बिहीवारको बैठकले विधान अधिवेशन र सदस्यता नवीकरणको तयारी रोक्न संस्थापन पक्षसँग माग गरेको थियो ।
माधव नेपाल पक्षको सो माग संस्थापन पक्षले भने अस्वीकार गरेको छ ।
