०२ असार २०८३, मंगलबार
नेकपा एमालेका अध्यक्ष एवं प्रतिनिधि सभामा प्रमुख प्रतिपक्षी दलका नेता केपी शर्मा ओलीले प्रधानमन्त्रीबाट हट्नु परेकोमा आफूलाई चिन्ता नभएको दाबी गरेका छन् । उनले विगतमा पनि आफूलाई जालझेल गरेर फर्काइएको र यसपटक पनि जाली मुद्दा हालेर हटाइएको दाबी गरे ।
मंगलवार बसेको प्रतिनिधि सभा बैठकमा समय लिएर बोल्दै ओलीले आफू जनमतबाट प्रधानमन्त्रीमा निर्वाचित भएर आएको र भविष्यमा पनि अपार जनमतका साथ आउने दाबी गरेका हुन् ।
‘मैले पहिले पनि मूलढोकाबाट फर्किन्छु भनेको थिएँ, फेरि पनि असाधारण जनमतसहित मूल ढोकाबाटै सिंहदरबार प्रवेश हुन्छ । राम्रो ग्रहदशाले बनाएको होइन, मैले पहिले गरेको राम्रो काम देखेर नेपाली जनताले बनाएको । जाली मुद्दा जितेर या परमादेश बनेर होइन,’ ओलीले भने ।
ओलीले सरकार बनेको एक महिनासम्म मन्त्रिपरिषद् विस्तार गर्न नसकेको भन्दै प्रधानमन्त्रीप्रति कटाक्ष गरे । ‘चार जना मन्त्री लिएर सरकार चलाउनु भएको छ क्यारे, बाँकी सबै आफैसँग छन् । मन्त्रालय दिनभर घुमेर भ्याउनु हुन्न होला,’ ओलीले भने ।
प्रतिनिधि सभा पुनःस्थापना भएपछि ओलीले पहिलो पटक संसद्मा सम्बोधन गरेका हुन् । प्रधानमन्त्री शेरबहादुर देउवा संसद्को बैठकमा उपस्थित छन् ।
प्रधानमन्त्रीले सम्बोधन गर्दा प्रतिपक्षी दलको नेता उपस्थित हुने र प्रतिपक्षी दलको नेता बोल्दा प्रधानमन्त्री उपस्थित हुने संसदीय परम्परा छ ।
