२९ असार २०८३, सोमबार
नेकपा एमाले विभाजन गरेर माधव कुमार नेपाल पक्षले एमाले समाजवादी पार्टी गठन गरेपछि बागमती प्रदेशमा हलचल उत्पन्न भएको छ ।
पार्टी एकता जोगाउन तथा सत्ता टिकाइराख्न संस्थापन पक्षले नयाँ मुख्यमन्त्रीको रुपमा यसअघि माधव कुमार नेपाल पक्ष भनेर चिनिने अष्टलक्ष्मी शाक्यलाई अघि सारेको छ ।
सोही अनुसार बुधबार संसदीय दलको बैठक राखेर शाक्यलाई एमाले संसदीय दलको नेता चयन गरिएको छ भने मुख्यमन्त्री डोरमणि पौडेलले राजीनामाको तयारी गरेका छन् ।
यद्यपि राति ८ बजेसम्म उनको राजीनामा आएको छैन । बागमती प्रदेश प्रमुखको सचिवालयका सचिव नारायणप्रसाद भट्टले आफूहरु तयारी अवस्थामा कार्यालयमै रहेको तर मुख्यमन्त्रीको राजीनामा नआएको लोकान्तरलाई बताए । ‘हामी तयारी अवस्थामा छौँ, राजीनामा आएको छैन । नयाँ प्रक्रियाका लागि एमालेबाट पत्र आएपछि हाम्रो काम हामी सुरु गर्छौँ ।’ उनले भने ।
उनका अनुसार शाक्यलाई मुख्यमन्त्री बनाउनेबारेको जानकारी भने आएको छ । सोही अनुसार प्रदेशबाहिर रहेका प्रदेश प्रमुख विष्णु प्रसाद प्रसाईँ साँझ पौने ७ बजे हेटौडा आएको उनले बताए ।
