नेकपा एमालेले पार्टीले कारवाही गरेका १४ सांसदमाथिको कारवाही रोकेर सभामुखले एमाले विभाजनमा भूमिका खेलेको आरोप लगाएको छ ।

विगतमा भएका कारवाही बिर्सेर सभामुखले दोहोरो मापदण्ड देखाएको एमालेको आरोप छ । मंगलवार बसेको एमाले स्थायी कमिटी बैठकले पारित गरेको प्रस्तावमा निश्चित पार्टीको विभाजनमा सभामुख सहभागी हुनु दुःखको विषय भएको बताएका हुन् । 

तुल्सीलाल स्मृति प्रतिष्ठानको कार्यालयमा आयोजित पत्रकार सम्मेलनमा सचिव प्रदीप ज्ञवालीले सभामुखको दोहोरो मापदण्डप्रति एमालेको विरोध रहेको बताएका हुन् । 

‘सभामुखबाट निकट विगतमा भएका तत्काल कारवाही बिर्सेर एमाले विभाजन गराइछाड्ने दोहोरो मापदण्डप्रति एमालेको विरोध छ । निश्चित पार्टीको विभाजनमा सभामुख सहभागी हुनु अस्वीकार्य विषय हो,’ ज्ञवालीले भने ।  

एमालेले ९ केन्द्रीय सदस्यसहित १४ सांसदमाथि भदौ १ गते कारवाहीका लागि संसद् सचिवालयमा पत्र पठाए पनि सभामुख अग्नि सापकोटाले कारवाही अगाडि बढाएका छैनन् । 

कारवाही अगाडि बढाउन सभामुखको कार्यकक्षमा एमाले सांसदले धर्ना दिएका थिए । सभामुखलाई धम्की दिएको भन्दै सत्ता गठबन्धनले एमालेको भूमिकाप्रति आपत्ति जनाएको थियो ।