२९ जेठ २०८३, शुक्रबार
नेकपा एमाले केन्द्रीय कमिटी बैठकले देशैभरका पालिकाको अधिवेशन कात्तिक ९ गते गर्ने निर्णय गरेको छ ।
तुल्सीलाल स्मृति प्रतिष्ठानमा भएको बैठकले महाधिवेशन केन्द्रित निर्णय गरेको छ ।
पार्टीमा तटस्थ रहेर बैठकमा सहभागी नहुने गरेका स्थायी कमिटी र केन्द्रीय कमिटी सदस्यसहित बिहीवार केन्द्रीय कमिटी बैठक बसेको हो ।
बैठकले पार्टीको संगठित सदस्यता असोज मसान्तभित्र नवीकरण गरिसक्नुपर्ने निर्णय गरेको नेत्री निरु पालले सामाजिक सञ्जाल फेसबूकमार्फत जानकारी दिइन् ।
भदौ १६–२० गतेसम्म पार्टीमा देखापरेका समस्या समाधान र १० बुँदे भावना अनुसार पार्टी चलायमान बनाउन जिल्ला भेला सम्पन्न गर्ने, भदौ २५–२६ गते स्थायी कमिटी बैठक र २७–२८ गते केन्द्रीय कमिटी बैठक गर्ने निर्णय भएको उनले बताइन् ।
पार्टीको विधान महाधिवेशन असोज ४, ५ र ६ गते गर्ने, देशैभरका सम्पूर्ण वडा अधिवेशन कात्तिक ६ गते गर्ने, देशैभरका पालिका अधिवेशन कात्तिक ९ गते गर्ने, १०औं राष्ट्रिय महाधिवेशन मंसिर १०, ११ र १२ गते काठमाडौंमा गर्ने निर्णय भएको जनाइएको छ ।
राष्ट्रिय जनगायक स्व. जेबी टुहुरेप्रति बैठकले शोक प्रस्ताव पारित गरेको जनाइएको छ ।
