नेपाली कांग्रेसका उपसभापति विमलेन्द्र निधिले १४ औं महाधिवेशनमा सभापतिको उम्मेदवारी घोषणा गर्दै सम्पर्क कार्यालयको उद्घाटन गरेका छन् । 

देशका विभिन्न प्रख्यात मन्दिरका पुजारीको उपस्थितिमा निधिले काठमाडौंको नयाँ बानेश्वरमा सम्पर्क कार्यालयको उद्घाटन गरेका हुन् । 

शुक्रवार बिहान ९ बजेको साइतमा निधिले सम्पर्क कार्यालय उद्घाटन गरेका हुन् । ‘सभापतिको उम्मेदवारी दिनका लागि सनातन धर्मअनुसार पूजापाठ गरेर बिहान ९ बजेको समयमा पण्डित नरेन्द्र दाहालबाट पूजापाठ गराएर कार्यालय उद्घाटन गरिएको छ,’ सम्पर्क कार्यालय उद्घाटन गरेपछि निधिले भने, ‘उद्घाटन कार्यक्रममा जानकी मन्दिरको महन्थ तपेश्वर दास आउनु भएको थियो । शुभारम्भ कार्यक्रममा आएर आशीर्वाद दिएर जानुभएको छ ।’ 

दक्षिणकाली मन्दिरको पुजारी, सूर्य विनायक, गृह्यश्वरीको पूजारी र पशुपतिनाथको भट्टको तर्फबाट भण्डारी आएर आसिक वचन दिएर गएको निधिले कार्यक्रममा जानकारी गराए । पञ्चायक निर्णायक समितिका कृष्ण अधिकारी, ज्योतिषी डा. सन्तोष वशिष्ठजीलगायत धार्मिक आध्यात्मिक व्यक्ति आएर पूजामा सहभागी भएको उनले जानकारी दिए । 

यसैगरी बौद्ध धर्मका लामाले २१ ताराको पूजा गरेर आफूलाई समर्थन गरेको निधिले बताए । मुस्लिम धर्मको मौलाना पनि आएको उनले बताए । निधिले १४ औं महाधिवेशनमा आफ्नो उम्मेदवारी कांग्रेसलाई पहिलो पार्टीको रुपमा स्थापित गर्न भएको बताए । 

‘कसैलाई अक्षम घोषणा गर्न वा रिटायर्ड गर्नको लागि सभापति बन्न खोजेको होइन, नेपाली कांग्रेसको रुख छापलाई मतदाता र जनतालाई जोड्नका उम्मेदवारी दिन लागेको हुँ,’ निधिले भने, ‘आगामी निर्वाचनमा कांग्रेसलाई पहिलो पार्टी बनाउने संकल्प साथ उम्मेदवारी दिन लागेको हुँ ।’