१० साउन २०८३, आइतबार
नेकपा (एकीकृत समाजवादी) पार्टीको संसदीय दलको पहिलो बैठक आज बस्न लागेको छ ।
नेकपा एमालेबाट छुट्टिएर बनेको नयाँ दलले आजको बैठकबाट संसदीय दलको नेता चयन गर्ने एजेण्डा रहेको उक्त पार्टीका सांसद मेटमणि चौधरीले बताए ।
नयाँ बानेश्वरस्थित संसदको ल्होत्से हलमा बैठक बोलाइएको उनले जानकारी दिए ।
सांसद विरोध खतिवडाका अनुसार राष्ट्रिय सभा तथा प्रतिनिधि सभा दुवैतरि दलको नेता र पदाधिकारी चयन गर्ने तयारी छ ।
नेकपा (एकीकृत समाजवादी) पार्टीका २९ जना सांसदले निर्वाचन आयोग पुगेर उक्त दलको पक्षमा सनाखत गरेका थिए ।
उक्त दलको संसदीय दलको नेतामा पार्टीका अध्यक्ष माधव कुमार नेपाललाई चयन गर्ने आन्तरिक तयारी छ ।
‘पार्टी अध्यक्ष नै संसदीय दलको नेता बन्नुहुन्छ’, सांसद चौधरीले भने ।
आजको बैठकमा सरकारमा सहभागिताको बारेमा पनि छलफल हुने बताइएको छ ।
मन्त्रिपरिषद विस्तारको बारेमा प्रधानमन्त्री शेरबहादुर देउवा, माओवादी केन्द्रका अध्यक्ष पुष्पकमल दाहाल प्रचण्ड र एकीकृत समाजवादीका अध्यक्ष माधवकुमार नेपालले प्रधानमन्त्री निवास बालुवाटारमा छलफल गरेका छन् ।
एकीकृत समाजवादीले सरकारमा सहभागी हुने बताइसकेको छ ।
