०७ असार २०८३, आइतबार
अफगानिस्तानमा २० वर्षसम्म सैन्य उपस्थिति कायम गरेको अमेरिका सोमवार मध्यरातदेखि पूरै हटेको छ ।
काबुल विमानस्थलबाट अन्तिम अमेरिकी सैनिक उडेपछि तालिबानले खुशियाली मनाएका छन् । कतारमा रहेका तालिबानका प्रवक्ता सुहैल शाहीनले देश पूर्ण रूपमा स्वतन्त्र भएको भन्दै अफगानहरूलाई बधाई दिएका छन् ।
तालिबानले देशमा उत्सव मनाउँदै गर्दा काबुलका सडकहरू सुनसान छन् । अलजजीराको रिपोर्टअनुसार, तालिबानका लागि यो ऐतिहासिक जीत हो ।
अफगानिस्तानमा विदेशी सैनिकको उपस्थिति सार्वभौमसत्ताको विरुद्ध रहेको भन्दै तालिबानले बयान दिँदै आएको छ ।
अमेरिकी सैनिकहरू गएपछि अब तालिबानसमक्ष अफगानिस्तानको पुनर्निर्माणको ठूलो जिम्मेवारी छ ।
तालिबानले सबै पक्षलाई समावेश गरेर कार्यकारी सरकार बनाउने घोषणा गरेको छ । त्यसमा अल्पसंख्यकहरूलाई पनि समावेश गरिने बताइएको छ ।
अफगानिस्तानमा लगभग २० वर्ष बस्दा २४ सय ६१ अमेरिकी सैनिक मारिएका छन् । जाँदै गर्दा पनि उनीहरू आईएसकेपीको आत्मघाती आक्रमणमा परेर मारिए ।
अमेरिकी सैनिक पूरै हट्नका लागि अगस्ट ३१ को म्याद दिइएको थियो । तर त्यसअगावै अन्तिम अमेरिकी सैनिक पनि हिँडे ।
