सभामुख अग्निप्रसाद सापकोटाविरुद्धको फौजदारी अभियोगसम्बन्धी मुद्दा संवैधानिक इजलासले आज पनि हेर्न नमिल्ने भनेर पन्छाएको छ । 

संवैधानिक इजलासमा रहेका न्यायाधीश हरिकृष्ण कार्कीका कारण सापकोटाविरुद्धको मुद्दा हेर्न नमिलेको हो ।

सापकोटाले अदालतको अवहेलना गरेको भनी मानवअधिकारकर्मी सुशील प्याकुरेलले हालेको मुद्दाको पक्षमा कार्की वकिल रहँदा बहस गरेका थिए । सोही कारण अहिले कार्कीले सापकोटाविरुद्धको मुद्दा हेर्न नमिल्ने अदालतको भनाइ छ । 

अहिले सभामुख सापकोटाविरुद्धका सबै मुद्दा एकै ठाउँमा राखेर सुनुवाइ भइरहेको थियो ।

द्वन्द्वकालमा काभ्रेका अर्जुन लामालाई अपहरण गरेपछि हत्या गरेको र त्यसमा सभामुख सापकोटा संलग्न रहेको भन्दै लामाकी श्रीमती पूर्णिमा लामाले २०६८ सालमा मुद्दा दर्ता गरेकी थिइन् । 

सापकोटाविरुद्धको फौजदारी अभियोगको मुद्दा १० वर्षदेखि अदालतमा विचाराधीन अवस्थामा छ ।