०३ असार २०८३, बुधबार
खाने मुखलाई जुगाले छेक्दैन जस्तै काम गर्नलाई उमेरले छेक्दैन भन्ने एक ज्वलन्त उदाहरण दिएका छन् डोटीको जोरायल गाउँपालिका–२ रिठा गाउँका ११ वर्षीय बालक सुशान्त पाठकले । उनले ११ वर्षको नाबालक उमेरमा ट्र्याक्टर चलाएर सम्पूर्ण काम गर्न थालेका छन् ।
सुरु सुरुमा घरमा आमा, बुबाले ट्र्याक्टर चलाउन त परै जाओस छुनसमेत नदिने गरेको भए पनि उनले लुकिछिपी ट्र्याक्टर चलाउने गरेका थिए । अहिले सुशान्तले ट्र्याक्टर चलाउन सिकेपछि उनका बुबाले पनि कामका लागि ट्र्याक्टर दिने गरेको बालक सुशान्तले बताए । उनले भने, “घरमा ट्र्याक्टर थियो, बुबाभन्दा आमाले त छुनै दिनु हुन्नथ्यो, मैले बुबाले चलाएको ट्र्याक्टर हेर्थे अनि लुकिलुकी चलाउन सिकेँ, अहिले त सबै खुशी छन्, काम गर्न पनि ट्र्याक्टर दिन्छन् ।” सुशान्तले ट्र्याक्टरको ट्रली जोड्ने, खेत जोत्ने, गिट्टी, बालुवा ल्याउन थालेपछि घरका मान्छेदेखि अन्य छरछिमेकमा रहेका मानिस पनि चकित परेका छन् ।
सुशान्तले ट्र्याक्टर, कार, मोटरसाइकल सबै चलाउन सक्षम भएका छन् । सानै उमेरमा ट्र्याक्टर, कार, मोटरसाइकल चलाउने सुशान्त सम्भवतः सुदूरपश्चिम प्रदेशमै पहिले बालक भएको उनका बुबा दीनेशराज पाठकले बताए ।
