२४ जेठ २०८३, आइतबार
धनी देशहरूले जम्मा गरेर राखेको १० करोड कोभिड खोप यस वर्षको अन्त्यसम्ममा बर्बाद हुने भएका छन् ।
साइन्टिफिक इन्फर्मेसन यान्ड एनालाइटिक्स कम्पनी एयरफिनिटीको अनुसन्धानले यो कुरा पत्ता लगाएको हो । अनुसन्धानका अनुसार, उत्तरी गोलार्धमा धनी देशहरूले स्टक गरेर राखेको १० करोड खोप डिसेम्बर २०२१ सम्म उपयोग नगरिएमा नष्ट हुनेछन् ।
दश करोड खोपमा ४१ प्रतिशत युरोपेली संघ र ३२ प्रतिशत अमेरिकासँग छ ।
अमेरिकाका राष्ट्रपति जो बाइडनले आयोजना गर्न लागेको खोप शिखर सम्मेलनमा बाँकी रहेको खोपको डोजका विषयमा योजना बनाउने सम्भावना छ । सन् २०२२ को अन्त्यसम्म महामारीलाई समाप्त पार्नका लागि संसारभरि खोप अभियानलाई प्रोत्साहन गर्नु उक्त भर्चुअल सम्मेलनको उद्देश्य हो ।
संसारभरि दिइएका कोरोना खोपको ५.७ अर्ब डोजमध्ये २ प्रतिशत मात्र अफ्रिकामा छ ।
एयरफिनिटीको भविष्यवाणी अनुसार, खोप प्रवाहमा तीव्रता नदिइएमा अर्को वर्षको गर्मीसम्ममा १० करोड कोभिडको केस बढ्नेछ । अनि भेन्टिलेटर र अक्सिजनको कमीका कारण थप १० लाख मृत्यु हुन्छ ।
धनी मुलुकले थुपारेर राखेको खोप बिग्रेर जाने अनि गरीब मुलुकका मानिस मर्ने स्थिति आउनेछ ।
