एमालेबाट छुट्टिएर बनेको नेकपा एकीकृत समाजवादी पार्टीको केन्द्रीय कमिटी बैठकले महासचिव छान्ने भएको छ । 

काठमाडौंमा जारी केन्द्रीय कमिटीको पहिलो बैठकले महासचिव टुंगो लगाउन लागेको हो । असोज ५ देखि शुरू भएको बैठक भोलि पनि बस्ने गरी स्थगित भएको छ । 

असोज ७ मा बस्ने बैठकमा एकीकृत समाजवादीको केन्द्रीय कमिटी, स्थायी कमिटी र पोलिटब्यूरो सदस्य छान्ने, महासचिव नियुक्त गर्ने र समसामयिक राजनीतिका बारेमा छलफल गर्ने एजेन्डा रहेको प्रचार विभाग प्रमुख जगन्नाथ खतिवडाले बताए । 

एकीकृत समाजवादीको अध्यक्ष माधव नेपाल छन् भने अन्य पदाधिकारी चयन भएका छैनन् । प्रदेशका इञ्चार्ज, सचिवालय र पाँच सदस्यीय स्थायी कमिटी बनेको भए पनि त्यसले पूर्णता पाइसकेको छैन । 

अहिले स्थायी कमिटीमा अध्यक्ष माधवकुमार नेपाल, वरिष्ठ नेता झलनाथ खनाल, मुकुन्द न्यौपाने, वेदुराम भुसाल र प्रमेश हमाल छन् । केन्द्रीय कमिटी बैठकले स्थायी कमिटीलाई पनि पूर्णता दिन लागेको छ । 

नेकपा एकीककृत समाजवादीको महासचिव कतिपयले युवा पुस्ताबाट ल्याउनुपर्ने बताइरहेका छन् भने कतिपयले पार्टी नयाँ रहेकाले अग्रज पुस्ताका नेतालाई नै महासचिवको जिम्मेवारी दिनुपर्ने आवाज उठाएको एक केन्द्रीय सदस्यले बताए । 

तर, धेरै जसोको मत भने अहिलेका लागि अग्रज पुस्ताबाट नै महासचिव बनाउनुपर्ने पक्षमा रहेको छ । 

एकीकृत समाजवादीभित्र महासचिवको लागि बेदुराम भुसाल, प्रकाश ज्वाला, राजेन्द्र पाण्डे, विजय पौडेल लगायतको नाम चर्चामा छ । 

तर, पार्टी अध्यक्ष माधव नेपाल भने स्थायी कमिटी सदस्य बेदुराम भुसाललाई महासचिव बनाउने पक्षमा छन् ।

असोज ७ को केन्द्रीय कमिटी बैठकमा भुसाललाई महासचिवमा प्रस्ताव गर्ने तयारी रहेको अध्यक्ष नेपाल निकट स्रोतले बताएको छ ।

पार्टी अध्यक्षले महासचिवमा भुसालको नाम प्रस्ताव गर्दा बैठकले अस्वीकृत गर्ने सम्भावना नरहेको एकीकृत समाजवादीका एक केन्द्रीय सदस्यले बताए । 

‘महासचिवका आकांक्षी तीनचार जना हुनुहुन्छ । पार्टी शुरूआती अवस्थामा भएकाले अनुभवी नेतालाई नै महासचिवको जिम्मेवारी दिनुपर्छ भन्नेमा धेरैजसो सहमत नै हुनुहुन्छ । महासचिवमा बेदुराम भुसालको नाम प्रस्ताव हुँदा सबैले स्वीकार्छन्’, एक केन्द्रीय सदस्यले बताए । 

राष्ट्रिय सभाका सदस्य समेत रहेका नेता भुसाल पार्टीभित्र बौद्धिक नेताको रूपमा परिचित छन् । नेकपा एकीकृत समाजवादी दर्ताका लागि दस्तावेज तयार गर्न भुसालले नेतृत्वदायी भूमिका निर्वाह गरेका थिए । 

यसअघि प्रदेश इञ्चार्जको जिम्मेवारी तोकिइसकेको छ ।

प्रदेश १ मा घनेन्द्र बस्नेत, प्रदेश २ मा धर्मनाथ साह, बागमती प्रदेशमा केदार न्यौपाने, गण्डकी प्रदेश केशवलाल श्रेष्ठ, लुम्बिनी प्रदेशमा भगवत विश्वसी र कर्णाली प्रदेशमा प्रकाश ज्वालाले इञ्चार्जको जिम्मेवारी पाएका छन ।

सुदूरपश्चिम प्रदेशमा भने इञ्चार्ज तोक्न बाँकी छ ।

यसैगरी, उपत्यका विशेष प्रदेश इञ्चार्जमा विश्वनाथ प्याकुरेल, सम्पर्क विशेष प्रदेश इञ्चार्जमा विजय गुरूङ र मोर्चा इञ्चार्जमा डा. विजय पौडेललाई जिम्मेवारी दिइएको छ ।