०८ असार २०८३, सोमबार
अमेरिकाको गुप्तचर संस्था सीआईएले आफ्ना धेरै सूचनादाताहरू मारिएको, कब्जा गरिएको वा किनिएको स्वीकार गरेको छ ।
संसारभरि रहेका आफ्ना गुप्तचरहरूलाई गोप्य मेमो पठाएर सीआईएले यो स्वीकार गरेको हो ।
सीआईएका स्टेसन र बेसहरूमा पठाइएको मेमोमा प्रतिगुप्तचरी मिसन केन्द्रले कैयौं वर्षको केसको विश्लेषण गरेको जानकारी दिएको छ ।
मारिएका सूचनादाताहरूको यकिन संख्या मेमोमा दिइएको छ जबकि यस्तो गोप्य सूचना प्रायः शेयर गरिँदैन, द न्युयोर्क टाइम्सले लेखेको छ ।
चीन र इरानले सीआईएका गोप्य सञ्चारलाई ह्याक गरेर गुप्तचरहरू मारेको अनि अन्य गुप्तचरलाई अन्यत्रै सेटल गराउनुपरेको खुलासा पूर्वअधिकारीहरूले गरेका छन् ।
मेमोमा गुप्तचरहरूलाई राम्रो काम नगरेको, स्रोतलाई चाहिने भन्दा बढी विश्वास गरेको, विदेशी गुप्तचर संस्थाहरूलाई कम आँकेको र सुरक्षाभन्दा पनि मिसन सक्ने हतारोलाई प्राथमिकता दिएको अनि सम्भावित खतरामा उचित ध्यान नदिएको भनी आलोचना गरिएको छ ।
रुस, चीन, इरान र पाकिस्तानले हालैका वर्षमा सूचनादातालाई खोजेर मार्न सफलता पाएको र कहिलेकाहीँ डबल एजेन्ट बनाएको पनि पाइयो ।
इरान र चीनमा अमेरिकीहरू आफैंले सूचनादाताको जानकारी त्यस देशका गुप्तचर निकायलाई उपलब्ध गराएको विश्वास गुप्तचर अधिकारीहरूले गरेका छन् ।
अमेरिकाका प्रतिस्पर्धी मुलुकहरूको प्रतिआतंकवादी निकायहरूले बायोमेट्रिक स्क्यान, अनुहार पहिचान प्रविधि, कृत्रिम बौद्धिकता र ह्याकिङमार्फत सीआईएका अधिकारीहरूलाई पत्ता लगाएको पनि पाइएको छ ।
