१ नम्बर प्रदेशमा सत्तापक्ष र प्रतिपक्षबीच औपचारिक कार्यक्रममा जुहारी चलेको छ ।

बुधवार प्रदेशसभा भवन उद्घाटन कार्यक्रममा सत्तापक्षका नेता र प्रतिपक्षी दलका नेताबीच जुहारी चलेको हो ।

सभामुख प्रदीपकुमार भण्डारीले बोलाएको कार्यक्रममा बोल्ने नेताको भाषणले मञ्चलाई रोमाञ्चक नै बनायो । शुरूमा बोलका प्रतिपक्षी दलका नेता मुख्यमन्त्रीमाथि खनिएका थिए ।

‘लाजसरम केही रहेनछ, नाङ्गै भइसक्दा पनि विभिन्न बहानामा लाज छोपिरहेका छन्,’ नेकपा एकीकृत समाजवादीका नेता राजेन्द्रकुमार राईले भने, ‘केन्द्रमा पाटी फुटिसके पनि गाउँमा फुटेको छैन भन्दै यो सरकार बसिरहेको छ । योभन्दा लाजमर्दो के हुन्छ ?’

नेकपा माआवादी संसदीय दलका नेता इन्द्र आङ्वोले मुख्यमन्त्री निष्ठाको राजनीति गर्ने भए पनि आसेपासेले बिगारेको आरोप लगाए । उनले आचार्यलाई संविधान पढ्न समेत सुझाव दिए ।

विपक्षी गठबन्धनका नेताहरूले मुख्यमन्त्रीलाई राजीनामा दिएर नयाँ सरकार बनाउने बाटो खुला गरिदिन आग्रह गरे । ‘सरकार गठन गर्ने बाटो खुला गरेर मार्गप्रशस्त बनाइदिएर आफ्नो इज्जत र प्रतिष्ठा जोगाउन आग्रह गर्छौैं,’ नेपाली कांग्रेसका प्रमुख सचेतक केदार कार्कीले भने, ‘अझै समय छ आफ्नो राजनीतिक जीवनलाई धमिलो बनाएर नजानुहोस् भन्ने मेरो आग्रह छ ।’

कार्यक्रमको अन्तिममा बोलका मुख्यमन्त्री आचार्यले पनि दलका नेताहरूलाई रामै्र जावफ फर्काए । उनले भने, ‘कानून पढ्न भन्ने नेताहरूले संसदीय मर्यादा भुल्नु हुँदैन, गिरेर बोल्नु हुँदैन ।’

आचार्यले आफूलाई पनि भाषण गर्न आउने भए पनि गिरेर नबोल्ने बताए । ‘दशैंमा मासु खाएर ठन्डा दिमाग बनाएर आउनुहोस् अनि बसेर छलफल गरौं,’ उनले भने । उनले दशैंअघि विश्वासको मत नलिने संकेत समेत गरेका छन् ।

विपक्षी गठबन्धनका ४ नेता एकै ठाउँमा 

कार्यक्रममा मुख्यमन्त्री आचार्यसहित मन्त्रीहरूका लागि  सोफाको व्यवस्था गरिएको थियो । मुख्यमन्त्रीको अगाडिपट्टि संसदीय दलका नेताहरू बसेका थिए । एमाले फुटेर नेकपा एकीकृत समाजवादी बनेपछि राजेन्द्र राई र भीम आचार्य औपचारिक कार्यक्रममा पहिलोपटक आमनेसामने भएका थिए । दुवै जनाले हेराहेर गरे पनि बोलचाल भएन ।

नेपाली कांग्रेसका प्रमुख सचेतक केदार कार्की, नेकपा एसका संसदीय दलका नेता राजेन्द्र राई, नेकपा माओवादी केन्द्र संसदीय दलका नेता इन्द्र आङवो, जनता समाजवादी पार्टी संसदीय दलका नेता जयराम यादव लगायत विपक्षी गठबन्धनका नेताहरू एकै ठाउँमा बसेर फोटो खिचाइरहेका थिए ।

प्रदेश सरकारको कूल ३ करोड १० लाख १८ हजार ३६८ रुपैयाँ खर्च गरेर नयाँ भवन निर्माण गरिएको हो । नवनिर्मित भवनमा प्रदेशसभा सदस्यका लागि ११० वटा कुर्सी, टेबल र टेबलमै माइक जडान गरिएको छ । पत्रकारका लागि माथिल्लो तल्लामा बसाइ व्यवस्थापन गरिएको छ । दर्शकदीर्घामा कूल ४० जना, पत्रकारका लागि २० र कर्मचारीका लागि २० वटा कुर्सीको व्यवस्थापन गरिएको प्रदेशसभा सचिवालयका सचिव गोपालप्रसाद पराजुलीले बताए ।