३१ जेठ २०८३, आइतबार
काठमाडौं महानगरपालिका– १३ बाफल बस्ने ४० वर्षीय रिजु श्रेष्ठको घरमा जुवातास खेलिरहेको अवस्थामा महानगरीय प्रहरी वृत्त कालिमाटीको टोलीले बिहीवार १९ जनालाई पक्राउ गरेको छ ।
काठमाडौंको कोटेश्वर बस्दै आएका मकवानपुरको थाहा नगरपालिका– ६ का ३८ वर्षीय कविन्द्र बलामीलगायत १९ जनालाई बुधबार राति प्रहरीले पक्राउ गरेको महानगरीय प्रहरी परिसर काठमाडौंका प्रवक्ता एसपी रमेशकुमार बस्नेतले जनाकारी दिए ।
प्रहरीले उनीहरूको साथबाट नगद २ लाख ८६ हजार ६५ रुपैयाँ, ३३ थान कौडा, ७ बुक तास, २८ थान मोबाइल र १ थान चेक बुकसहितका सामान बरामद गरेको छ ।
यस्तै लमजुङको मध्यनेपाल नगरपालिका–२ सोतीपसल बस्ने धनवीर गुरुङको घरमा तास खेलिरहेको अवस्थामा ३९ वर्षीय सूर्यलाल पौडेल लगायत ९ जनालाई बुधबार दिउँसो प्रहरीले पक्राउ गरेको छ ।
उनको घरमा तास खेलिरहेको भन्ने खबर प्राप्त हुनासाथ प्रहरी चौकी सोतीपसल र इलाका प्रहरी कार्यालय भोर्लेटारबाट खटिएको प्रहरीले उनीहरूलाई नगद ७६ हजार १ सय ८० रुपैयाँ र ४ बुक ताससहित फेला पारी पक्राउ गरेको जिल्ला प्रहरी कार्यालय लमजुङले जनाएको छ ।
कास्कीको पोखरा महानगरपालिका–८ सिमलचौर बस्ने २७ वर्षीया दिप्ती गुरुङको घरमा तास खेलिरहेको अवस्थामा गुरुङ लगायत ८ जनालाई बुधबार दिउँसो प्रहरीले पक्राउ गरेको छ ।
उनको घरमा तास खेलिरहेको भन्ने खबर प्राप्त हुनासाथ जिल्ला प्रहरी कार्यालय कास्कीबाट खटिएको प्रहरी टोलीले उनीहरूलाई नगद १ लाख ७ हजार ६ सय ४५ रुपैयाँ र २ सय ११ पत्ती ताससहित फेला पारी पक्राउ गरेको जिल्ला प्रहरी कार्यालय कास्कीले जनाएको छ ।
चाडपर्व बढेसँगै जुवातास खेल्ने र खेलाउनेहरूलाई प्रहरीले दैनिक पक्राउ गरिरहेको छ । प्रहरीको विषेश सेफ्टी पिनअन्तर्गत जुवातास खेल्ने र खेलाउनेलाई निगरानी गरिरहेको प्रहरी प्रधान कार्यालयले जनाएको छ ।
प्रहरी प्रधान कार्यालयको तथ्याङ्कअनुसार पछिल्लो १५ महिनामा मात्रै देशभरमा ४ हजार २०१ जनालाई पक्राउ गरेको छ ।
आर्थिक वर्ष २०७७/०७८ मा ३ हजार ३३२ पुरुष, १ सय ८ जना महिला र १६ जना विदेशी गरी ३ हजार ४५६ जना पक्राउ परेका छन् ।
चालू आर्थिक वर्षको भदौ मसान्तसम्ममा ६९१ जना पुरुष, ४४ महिला र १० जना विदेशी नागरिक गरी ७ सय ४५ जना पक्राउ परेको प्रहरी प्रधान कार्यालयले जनाएको छ ।
जसमा अघिल्लो आर्थिक वर्ष अर्थात २०७७/०७८ मा ४९५ वटा मुद्दा र यो आर्थिक वर्षको भदौ मसान्तसम्ममा १ सय ८ गरी ६ सय ३ मुद्दा चलाएको प्रहरी प्रधान कार्यालयले जनाएको छ ।
