ललितपुर वाग्मती गाउँपालिका–७ देवीचौरकी २८ वर्षीया रजीना भोलुनलाई श्रीमान् राजकुमार भोलुनले बेलाबेलामा मदिरा सेवन गरेर कुटपिट गर्थे । सामान्य ज्यामी काम गर्दै आएका उनीहरूको घरमा सामान्य झगडा भइनै रहन्थ्यो । 

उनीसँगै रजीनाकी साली सुनीता सिँतान र उनका भाइ ज्ञानबहादुर सिँतान पनि नजिकै बस्थे । भिनाजुले दिदीसँग गरेको व्यवहार उनीहरूले पनि नजिकैबाट नियालेका थिए । 

त्यसको प्रत्यक्ष साक्षी थिइन् ललितपुर गोदावरी नगरपालिका–१२, ठेचोकी रजीनाकी साथी ३० वर्षीया लक्ष्मी ब्लोन । एक दिन रजीनाले आफ्ना श्रीमान्लाई ठेगान लगाउने बताइन् । 

उनलाई साथी लक्ष्मीले आफूसँगै लिभिङ टुगेदर बस्ने प्रेमी गोदावरी नगरपालिका–११ का मनोज मगर भन्ने मनोज शाकी भएको उनी बलियो पनि भएकाले राजकुमारको हत्या गर्ने योजना सुनाइन् । त्यो रजीनालाई पनि चित्त बुझ्यो । 

लक्ष्मी र उनका प्रेमीले हत्या गरेबापत ५० हजार रूपैयाँ लिने र अग्रिम ५ हजार लिने योजना बनाए । उनीहरूले अग्रिम भुक्तानी बापतको पैसा लिए ।

योजना अनुरुप उनीहरूले राजकुमारको असोज ११ गते ललितपुरको प्यूटारमा धारिलो हतियारले टाउको र घाँटीमा प्रहार गरेर भागे । राजकुमारको मृत्यु भएपछि भाग्ने क्रममा मनोजकुमार गोदावरी नगरपालिका–७ देवीचौरको सलेनी खोल्सामा लडेर मृत्यु भयो । 

त्यसलगत्तै भागेका अन्यलाई महानगरीय प्रहरी परिसर ललितपुरले आज पत्रकार सम्मेलन गरेर सार्वजनिक गरेको छ ।

प्रहरीले हत्या आरोपीहरू मृतककी श्रीमती ललितपुर वाग्मती गाउँपालिका–७ देवीचौरकी २८ वर्षीया रजीना भोलुन, गोदावरी देवीचौरकै ३० वर्षीय ज्ञानकुमार सिंतान, वाग्मती गाउँपालिका–७ कै सुनीता सिंताङ र गोदावरी नगरपालिका–१२ ठेचोकी लक्ष्मी ब्लोनलाई पक्राउ गरी सार्वजनिक गरेको हो ।