माघ २७, २०८०
भगवान् गौतम बुद्धको जन्मस्थल लुम्बिनी विश्वकै लागि शान्तिक्षेत्र हो । यो क्षेत्र आउँदो महिना विशेष हुने भएको छ । विश्वकै प्रतिष्ठित र ठूलो पुरस्कार मानिने नोबेल पुरस्कार विजेताहरूको जमघट हुने भएपछि विशेष हुन लागेक...
असोज ३१, २०७८
ललितपुरको कुपण्डोल–पुल्चोक सडकबाट बखुण्डोल मोडिने कर्नरमा एउटा सानो सटरमा सैलुन पसल छ, जहाँ सियाराम ठाकुरले तीन दशक बिताए । शुरूमा पुल्चोकको मूल सडकमा उनको सैलुन पसल थियो, तर भाडा तिर्न नसकेपछि उनी कर्नरको एउटा साघुरो सटरमा बसेर निरन्तर काम अगाडि बढाइरहेका छन् । अगाडि सडकमा भाडा तिर्न नसकेपछि घरभेटीले नै उनलाई सानो सटर बनाइदिए ।
पञ्चायतको समयमा काठमाडौं आएर सैलुन पसल सञ्चालन गरेका सियारामले उनकै शब्दमा ‘तीन जुग’का मन्त्रीहरूको कपाल काटे । पञ्चायत, प्रजातन्त्र काल र गणतन्त्रको समयमा धेरै मन्त्रीको दारी कपाल सिंगार्ने काम उनले गरे । अहिलेका प्रधानमन्त्री शेरबहादुर देउवा गृहमन्त्री रहेको समयमा २०४८ पछिका दिनमा उनले कपाल काटिदिन्थे ।
‘उहाँको अलि छटपटे बानी थियो, आज मिटिङ छ, छिटो–छिटो काटिदेऊ भन्ने’ पुराना दिन सम्झिँदै सियारामले भने ।
जतिबेला बाहिर कपाल काटेको शुल्क लगभग ५० रुपैयाँ थियो मन्त्री क्वार्टरमा गएर कपाल काट्दा देउवाले ५ सय रुपैयाँ दिन्थे ।
लामो समय कपाल काट्दा देउवासँग उनको भेट बाक्लिँदै गयो । गृहमन्त्री रहेको समयमा देउवाले सियारामलाई केही सहयोग गर्न खोजेका थिए, तर आफ्नो कमाइ राम्रै रहेका उनले खासै लोभ गरेनन् । दोस्रो व्यक्तिले कर गरेपछि मात्र सियारामले मन्त्रालयमा एउटा निवेदन हालेका थिए, निवेदनको काम चलिरहेको समयमा संसद् विघटन भएपछि उनको काम अलपत्र भयो ।
गृहमन्त्रीबाट हटेपछि देउवासँग उनको भेट एकपटक महेन्द्र पुलिस क्लबमा भयो । पूर्व अञ्चलाधीश बद्रिविक्रम थापाको छोरा किरण विक्रम थापाले आयोजना गरेको भोजमा । ‘मैले उहाँको धेरैपटक कपाल काटेँ, त्यो बेला उहाँले मलाई सहयोग गर्न खोज्नुभएको थियो जतिबेला मलाइ आवश्यक थिएन, अहिले सहयोग चाहिएको छ प्रधानमन्त्रीलाइ भेट्नै सक्दिनँ,’ उनले भने ।
२०४२ सालका काठमाडौं आएर सैलुन पसल शुरू गरेका सियारामले पञ्चायतदेखि गणतन्त्रसम्म मन्त्री बनेका नेताहरूको कपाल मिलाइदिए । त्यो बेला सीमित सैलुन पसल रहेकोमा पुल्चोक आसपासमा उनको मात्र पसल थियो । मन्त्री क्वार्टरमा कपाल काट्ने जिम्मा उनकै हुन्थ्यो– पञ्चायतदेखि गणतन्त्रसम्म । त्यो बेला पुल्चोक सडकमा सटर भाडा ४ सय रुपैयाँ थियो ।
‘भीआइपी’ मध्ये उनले सबभन्दा धेरै कपाल काटेको व्यक्ति डा. रामवरण यादवको हुनुपर्छ । मन्त्री हुँदा या नहुँदा प्रायः सियारामले नै रामवरणको कापाल काट्ने गरेका थिए । २०५८ साल जेठमा दरबार हत्याकाण्ड भएपछि सियारामको सैलुनमा कपाल काट्नेको लामो लाइन थियो, रामवरण यादव कपाल खौरिन ७ पटक आए । तर भीड भएपछि साँझ सियाराम रामवरणको घरमै गएर कपाल काटिदिए । ‘उहाँले गाडी पठाइदिएपछि साँझ घरमै गएर कपाल काटें, त्यो बेला कुसुन्तीतिर बस्नु हुन्थ्यो’ सियारामले सम्झिए ।
आफूले धेरै पटक कपाल काटेको र एउटै भेगको नेता डा. रामवरण राष्ट्रपति भएकोमा उनी ज्यादै खुशी थिए । एक दिन राष्ट्रपतिलाई भेट्न भन्दै कार्यालय पुगेका थिए । ‘सामान्य आदमीले भेटन पाउँदैन भनेर फर्काइदिए, मन खिन्न भयो, फेरि गइनँ,’ ठाकुरले सम्झिए ।
२०४८ सालपछि मन्त्री बनेका कांग्रेसका नेताहरू शायदै होलन्, सियारामले कपाल नकाटेको । कृष्णप्रसाद भट्टराई, शेरबहादुर देउवादेखि रामचन्द्र पौडेल, पूर्णबहादुर खड्कादेखि गोविन्दराज जोशीसम्मका नेताहरूको कपाल काट्ने काम उनले गरे ।
भैँसेपाटी र बाँडेगाउँमा बसाइँ सर्नुअघि भट्टराईको कपाल मिलाउने काम सियारामकै थियो । तिनताका भट्टराई बखुण्डोलमै बस्दथे । ‘पान खान निक्सने बेलामा पनि, अच्छा हे न ठाकुरजी ? भन्दै जाने आउने गर्नुहुन्थ्यो,’ ठाकुरले स्मरण गरे ।
सद्भावनाका अध्यक्ष गजेन्द्र नारायण सिंहदेखि बद्री मण्डल र खोवारी रायसम्म उनका ग्राहक थिए । गणतन्त्र स्थापना भएपछि उनले माओवादीका स्व. पोष्टबहादुर बोगटी तथा हाल राजनीतिबाट अलग रहेका लोकेन्द्र विष्ट मन्त्री भएको समयमा कपाल काटे । २०४८ पछि मन्त्री बनेका अधिकांशको कपाल काटे पनि कसैको नाम बिर्सिए ।
पञ्चायतकालका गृहमन्त्री एवं राप्रपा नेता भोजराज घिमिरे, यमबहादुर मल्ल, रामविलाश यादव, सोनेलाल यादव, महेश्वर सिंह लगायत धेरैको कपाल सियारामले मिलाए ।
२०५६ सालमा तारानाथ रानाभाट प्रतिनिधि सभाको सभामुख बनेपछि उनका एक ग्राहक थपिए । ‘सभामुखजीले धेरै माया गर्ने, दशैंमा च्याङ्ग्राको मासुसित भात खुवाउनुभएको थियो,’ सियारामले पुराना दिन सम्झिए ।
नेकपा एमालेका नेता स्व. भरतमोहन अधिकारीले पछिल्लोपटक अर्थमन्त्री हुँदासम्म उनको सेवा लिएका थिए ।
‘महोत्तरीस्थित मेरो गाउँमा जग्गा लिएर मन्दिर बनाउँछु भन्नु भएको थियो, मलाई जग्गा खोजिदिन आग्रह पनि गर्नुभएको थियो, पछि खासै सम्पर्क भएन,’ सियारामले सम्झिए ।
‘भीआईपी’ग्राहकलाई भनेर अरूलाई जागिर लगाइदिए, आफ्नै छोरीलाई लगाउन सकेनन्
राष्ट्रिय राजनीतिका चर्चित अनुहारसँगै उनले समाजका अन्य प्रतिष्ठित व्यक्तिहरूको पनि कपाल काटे । पूर्व प्रधानन्यायाधीश कल्याण श्रेष्ठ, पूर्व गभर्नर सत्यन्द्रप्यारा श्रेष्ठलगायत धेरै भीआईपीको कपाल काटे ।
आफ्ना रेगुलर ग्राहक नेपाल राष्ट्र बैंकका तत्कालीन गभर्नर सत्यन्द्रप्यारा श्रेष्ठलाई भनसुन गरेर उनले दुई जनालाई राष्ट्र बैंकमा कार्यालय सहयोगीमा जागिर खुवाइदिए ।
‘त्यो बेला गभर्नरले जागिर खान आऊ भन्नुभएको थियो, तर म गइनँ । ६/७ जनालाई रोजगारी दिएर आफैँ पसल सञ्चालन गरेको मान्छे जागिर खान जाने कुरै भएन,’ उनले स्मरण गरे ।
तीन छोरी र दुई सन्तानका पिता सियारामकी माइली छोरी पाटन कलेजमा स्नातक पढ्दै छिन् । कान्छी छोरी ११ कक्षामा पढ्दैछिन् । तर अहिले स्नातक गर्दै गरेकी छोरीलाई जागिर लगाउन उनले धेरैलाई हारगुहार गरे, कसैले सहयोग गरेनन् ।
‘छोरी जागिर गर्दै पढ्दै गर्छु भन्छे, तर हाम्रो कुरा कसैले पुच्छ्दैन,’ सियारामले दुखेसो पोखे ।
अहिले ब्याच्लर पढ्दै गरेकी छोरीको उमेरमा उनले काठमाडौं आएर व्यावसाय शुरू गरिसकेका थिए ।
जिन्दगीको ६० औं वसन्त नजिकिँदै गर्दा उनलाई जीवनको संघर्षदेखि थकाइ लाग्न थालेको छ ।
‘पहिले कमाइ राम्रो थियो, खर्च थिएन । अहिले खर्च ज्यादा छ, कमाइ छैन,’ सियारामले भने, ‘छोराछोरीलाई कतै जागिर लगाउन सकियो भने अब विस्तारै गाउँ फर्किने हो ।’
भगवान् गौतम बुद्धको जन्मस्थल लुम्बिनी विश्वकै लागि शान्तिक्षेत्र हो । यो क्षेत्र आउँदो महिना विशेष हुने भएको छ । विश्वकै प्रतिष्ठित र ठूलो पुरस्कार मानिने नोबेल पुरस्कार विजेताहरूको जमघट हुने भएपछि विशेष हुन लागेक...
समय : आइतवार बिहान ७ बजे स्थान : नलगाड नगरपालिका, १ चिउरी, जाजरकोट (भूकम्पले सबैभन्दा धेरै क्षति पुर्याएको ठाउँ) ‘मेरी आमालाई किन यस्तो भयो ? मलाई पनि बाँच्न मन छैन,...
नृत्यका पारखीहरूका लागि लुम्बिनी प्रदेशमा लोकप्रिय नाम हो किशोर थापा । रुपन्देहीका किशोरको परिचय खाली नृत्यकार (डान्सर)मा मात्र सीमित छैन । उनी नृत्य निर्देशक, गायक, मोडल र फूटबल खेलाडीको रूपमा समेत उत्तिकै च...
पोखराका अशोक खड्काको पारिवारिक वातावरण सानैदेखि उद्यमशीलताको थियो । उनका बुवा सधैं एकै सुझाव दिइरहन्थे– नेपालमै केही गर्नुपर्छ । उनको बालमस्तिष्कमा त्यही छाप पर्यो । विदेश जाने सोच कहिल्यै बनाएनन् । नेप...
प्रगतिशील राजनीतिको 'फ्रन्टलाइन'मा देखिने नेताहरू जति कठोर हुन्छन्, त्यो भन्दा बढी ‘इमोसनल र सेन्टिमेन्टल’ पनि हुन्छन् । त्यस्तै ‘इमोसनल फिलिङ्स’का बाबजुद परिस्थितिले कठोर बन्दै गएक...
बुधवार काभ्रेको धुलिखेलस्थित काठमाडौं विश्वविद्यालयका १ हजार ८३८ जना विद्यार्थीमाझ सनम ढकाल दृश्यमा आए । एमबीबीएसमा सर्वोत्कृष्ट भएर गोल्ड मेडल ल्याउँदै सनम दीक्षित भएसँगै सबैमाझ परिचित भएका हुन् । काठम...
हामी १५औं अन्त्य गरेर १६औं योजनाको तयारीमा जाँदै छौं । दलका शीर्ष नेताबीच १६औं योजनाको विषयमा छलफल भएको छ । १५औं योजनाको असफलता र नमिलेका कुरालाई १६औं मा सुधार्छौं । हाम्रो गन्तव्य कहाँ हो भन्ने संविधानले ...
सच्चा लोकतन्त्रमा सिमान्तमा रहेको नागरिकले पनि यो देश मेरो हो भन्ने अनुभूति गर्न सक्नेछ- माहात्मा गान्धी । माथि गान्धीको भनाइ किन उद्धृत गरिएको हो भने नयाँ वर्षको आगमन भैसकेको छ र २०८० को बिदाइ बडो हर्षपूर्वक...
एक दिन काम विशेषले नयाँ सडकतिर गएको थिएँ, मोबाइल टिङटिङ गर्यो । हेरेँ पुराना मित्र जयदेव भट्टराई, सम्पादक मधुपर्क (हाल अवकाश प्राप्त) ले सम्झेका रहेछन् । हामी दुई लामो समयसम्म सँगै रह्यौँ, कहिले गोरखापत्र...