२१ जेठ २०८३, बिहीबार
रुपन्देहीको बुटवल उपमहानगरपालिका वेमौषमी वर्षाले धान बालीमा पुर्याएको क्षतिको विवरण संकलन थालिएको छ ।
नगर प्रमुख शिवराज सुवेदीले वर्षाले कृषि क्षेत्रमा पुर्याएको क्षतिको विवरण संकलन गर्न कृषि विकास शाखाका कर्मचारी तथा प्राविधिकहरूलाई निर्देशन दिएका छन् । क्षतिको विवरणका आधारमा तत्कालिन राहतका कार्यक्रम बनाउने उपमहानगरको तयारी छ । सोही कामका लागि क्षतिको विवरण संकलन भइरहेको छ ।
कृषि क्षेत्रमा परेको असरका बारेमा जानकारी लिन उपमहानगरका प्रवक्ता रामप्रसाद रेग्मीको नेतृत्वमा कृषि क्षेत्रमा विशेषज्ञहरुसहितको टोलीले यहाँको कृषि क्षेत्रको निरीक्षण र अनुगमन गरिरहेको छ । निरीक्षणको प्रारम्भिक रिपोर्ट अनुसार वर्षाले काटिसकेको धानमा क्षति पुगेको, तरकारी र फलफुलका विरुवामा नर्सरीमा क्षति पुगेको पाइएको छ ।
बुटवलमा हाल करिब ३ हजार हेक्टर क्षेत्रफलमा धान खेती भइरहेको छ । जसमध्ये करिब १० प्रतिशत क्षेत्रमा धान पाकेर काटिसकेको अवस्था छ र त्यसमध्ये ३ प्रतिशत धानमा क्षति भएको पाइएको छ ।
वर्षातले पारेको क्षतिको विवरण संकलनका लागि कृषि विकास शाखाका प्रमुख सन्तोष जिसी, प्राविधिक सहायक सोमनप्रसाद कुर्मी र वडा कृषि प्राविधिक वंशगोपाल म्रिश्रलगायतको टोली खटिएको अनुगमन महाशाखा प्रमुख भुवाप्रसाद लुइँटेलले बताए ।
बुटवलले सहरी कृषि प्रवद्र्धनमा धान, गहुँ र तरकारीमा अनुदान दिंदै आएको छ । बुटवलको सहरी कृषि प्रवद्र्धन कार्यक्रम मुलुकमै प्रभावकारी मानिन्छ । यहाँका किसानले धान, गहुँ, मकै र तरकारीको बिउमा अनुदान पाउनुका साथै फसल धितो राखेर समेत अनुदान लिइरहेका छन् ।
