अमेरिकाको फिलाडेल्फियामा मेट्रो ट्रेनमा अघिल्लो साता एक अवैध आप्रवासी पुरुषले एक महिलालाई बलात्कार गरेको हेरेर बस्ने मानिसहरूका विरुद्ध कुनै मुद्दा नचलाइने अभियोजकहरूले बताएका छन् । 

फिस्टन न्गोय नामक ३५ वर्षीय पुरुष कंगोबाट अमेरिका आएका थिए र सन् २०१५ देखि अवैध रूपमा त्यहाँ बसिरहेका थिए । उनले गत साता बुधवार महिलालाई बलात्कार गरेपछि पक्राउ गरेर अभियोग दायर गरिएको छ । 

अप्पर डार्बी नजिक साउथईस्टर्न पेन्सिल्भेनिया ट्रान्सपोर्ट अथोरिटीको ट्रेनमा उनी चढेको सीसीटीभी क्यामरामा देखिन्छ । 

राति सबा ९ बजेतिर उनले अपरिचित महिलालाई बलात्कार गर्दा त्यहाँ रहेका १० जनाले केही नगरेको उल्टो फोन निकालेर भिडियो खिचेको प्रहरीको भनाइ छ । 

उनले महिलालाई ९ः५२ सम्म आक्रमण गरिरहेका थिए । त्यसपछि एकजना व्यक्तिले ९११ अर्थात् आकस्मिक सेवामा फोन गरेका थिए । 

न्गोयले ती महिलालाई बारम्बार संवेदनशील अंगमा छोएका थिए र लुगा समेत च्यातिदिएका थिए । महिलाले न्गोयलाई बारम्बार घचेडेकी थिइन् ।

घटना सार्वजनिक भएपछि सर्वसाधारणले आक्रोश व्यक्त गरेका थिए । 

तर जिल्ला न्यायाधिवक्ता ज्याक स्टोलस्टाइमरले अपराधको प्रत्यक्षदर्शीलाई अभियोजन गर्ने कानून नभएको बताए ।