१९ असार २०८३, शुक्रबार
कर्णाली प्रदेशको मुख्यमन्त्रीमा नेपाली कांग्रेस संसदीय दलका नेता जीवनबहादुर शाहीले दाबी पेस गरेका छन् ।
नेपाली कांग्रेसका ६, नेकपा माओवादी केन्द्रका १२ र नेकपा एकीकृत समाजवादीका ३ सहित २१ प्रदेशसभा सदस्यको समर्थनमा उनले मंगलवार दिउँसो ४ बजे प्रदेश प्रमुखको कार्यालय पुगेर मुख्यमन्त्रीमा दाबी पेस गरेका हुन् ।
प्रदेशसभा हाल ३५ सदस्यीय छ । बहुमतका लागि १८ सदस्य आवश्यक पर्छ । कर्णाली प्रदेश प्रमुख गोविन्दप्रसाद कलौनीले सोमवार मुख्यमन्त्री महेन्द्रबहादुर शाहीलाई साँझ ७ः३० बजे संविधानको धारा १६८(२) बमोजिम प्रदेशसभामा कुनै पनि दलको स्पष्ट बहुमत नभएको अवस्थामा सभामा प्रतिनिधित्व गर्ने २ वा २ भन्दा बढी दलको समर्थनमा बहुमत प्राप्त गर्न सक्ने कर्णाली प्रदेशसभा सदस्यलाई मुख्यमन्त्री नियुक्ति गर्ने प्रयोजनका लागि २४ घण्टाभित्र दाबी पेस गर्न आह्वान गरेका थिए ।
सोही बमोजिम शाहीले मुख्यमन्त्रीमा मंगलवार दाबी पेस गरेका कर्णाली प्रदेश प्रमुखको कार्यालयका सचिव ठाकुरप्रसाद सिग्देलले जानकारी दिए ।
प्रदेश प्रमुखको कार्यालयले मुख्यमन्त्रीमा दाबी गरेका शाहीको शपथ ग्रहण मंगलवार राति साढे ८ बजे गर्ने तयारी गरेको उनले जानकारी दिए । मुख्यमन्त्री शाहीले शपथ ग्रहण गरेपनि अरु मन्त्रीले भने १/२ दिनमा शपथ ग्रहण गर्ने बताइएको छ ।
