२८ जेठ २०८३, बिहीबार
तालिबान सरकारले अफगानिस्तानमा रहेका समलिंगीहरूको सूची तयार गरेको छ । सूचीमा रहेका मानिसलाई खोजीखोजी मार्ने योजना बनाएको थाहा पाएपछि उनीहरू लुकेका छन् ।
शरिया कानूनको कट्टरपन्थी व्याख्या गर्ने तालिबानले समलैंगिकतालाई प्रतिबन्ध लगाएको छ र मृत्युदण्ड दिने गरेको छ ।
समलिंगी तथा तेस्रोलिंगीहरूको अधिकार समूहका निर्देशक किमाहलिउ पावलले तालिबानको सूचीका विषयमा खुलासा गरेका हुन् ।
‘अफगानिस्तानमा बस्ने यो खतरनाक समय हो,’ रेन्बो रेलरोडका कार्यकारी निर्देशक पावल बताउँछन् । उक्त संस्था अफगानिस्तानमा रहेको एक मात्र अन्तर्राष्ट्रिय समलिंगी संस्था हो ।
‘तालिबानको मृत्यु सूचीमा समलिंगी र तेस्रोलिंगीहरू रहेका छन्,’ उनले बताए ।
विदेशी अधिकारवादी संस्थाहरूले अफगानिस्तानबाट सुरक्षित बहिर्गमन गराउन खोजेका मानिसलाई तालिबानले नजिकैबाट नियालेको हुन सक्ने पावलको भनाइ छ ।
‘काबुलमा तालिबानको कब्जा भएपछि धेरै सूचना आदानप्रदान गरिएका थिए,’ पावलले बताए । बहिर्गमन गर्न नपाएकाहरूलाई तालिबानले मृत्यु सूचीमा राख्न सक्ने सम्भावना छ किनकि उनीहरूको पहिचान उजागर भएको छ ।
तालिबानले विभिन्न किसिमका फसाउने योजना र डेटा चुहाएर मृत्यु सूची बनाएको उनले दाबी गरे ।
