नेपाल तेक्वान्दो संघ बागमती प्रदेशको अध्यक्षमा केशव पुरी निर्विरोध निर्वाचित भएका छन् । शनिवार काभ्रेको धुलिखेलमा भएको प्रथम अधिवेशनबाट पुरी अध्यक्षमा निर्विरोध निर्वाचित भएका हुन् । 

उपाध्यक्षमा प्रकाश खड्गी र सुमन पाण्डे, महासचिवमा हरिहर ढुंगाना, सचिवमा उमेश नकर्मी र कोषाध्यक्षमा किरण थापा मगर निर्विरोध निर्वाचित भए । यसै गरी सदस्यहरूमा फिरोज श्रेष्ठ, कविराज माली, भास्कर श्रेष्ठ, केशव थापा, दिनेशकुमार बाँडा, राजेन्द्र खड्गी, रामचन्द्र ब्यञ्जनकार, नरेन्द्र थापा, रामकृष्ण श्रेष्ठ र वीरमान स्याङतान निर्विरोध निर्वाचित भए । संघको शनिवार नै धुलिखेलमा बसेको पहिलो बैठकले विराजभक्त श्रेष्ठ र दीपक मल्होत्रालाई उपाध्यक्षमा मनोनीत गरेको छ । 

प्रथम अधिवेशनको उद्घाटन पूर्वमन्त्री एवं नेपाली कांग्रेस खेलकुद विभाग प्रमुख मोहनबहादुर बस्नेतले गरेका थिए । कार्यक्रममा बागमती प्रदेश संघको कार्यालय स्थापनाका लागि जग्गा उपलब्ध गराएका नागार्जुन नगरपालिकाका मेयर मोहनबहादुर बस्नेत र सोही नगरपालिकाका वडा नम्बर ६ का अध्यक्ष राजेन्द्र बुढाथोकीलाई सम्मान गरिएको थियो । 

संघका लागि नागार्जुन नगरपालिकाले ९ रोपनी ९ आना जग्गा उपलब्ध गराउने भएको छ । यसै गरी हेटौडा नगरपालिका, समाजसेवी यज्ञलाल श्रेष्ठ र धननारायण चित्रकारलाई पनि सम्मान गरिएको थियो । कार्यक्रममा नेपालमा तेक्वान्दोका संस्थापक दीपराज गुरुङलाई अभिनन्दन गरिएको थियो। 

यसै गरी बागमती प्रदेशअन्तर्गत रहेका नवनिर्वाचित १३ वटै जिल्ला अध्यक्षहरूलाई पनि सम्मान गरिएको थियो । यस्तै १३औं दक्षिण एसियाली खेलकुद (साग)का स्वर्ण विजेता खेलाडीलाई पनि सम्मान गरिएको थियो ।

यस्तै बागमती प्रदेशमा उत्कृष्ट हुन सफल काठमाडौं जिल्ला तेक्वान्दो संघका अध्यक्ष अशोक खड्का, चितवनका गोपाल श्रेष्ठ र मकवानपुरका निरुकुमारी मगरलाई पनि सम्मान गरिएको थियो ।