२० असार २०८३, शनिबार
नेपाली कांग्रेसका नेता प्रकाशमान सिंहले सभापति शेरबहादुर देउवाको घरमा पार्टी केन्द्रीय कार्यसमितिको बैठक राखेकोमा असन्तुष्टि व्यक्त गरेका छन् ।
नेपाली कांग्रेस जिल्ला कार्यसमिति, काठमाडौंले सोमवार काठमाडौंमा आयोजना गरेको एक कार्यक्रममा बोल्दै उनले बूढानीलकण्ठ नदेखेको झैं गरेर सभापति देउवाले आफ्नै निवासमा आइतवार (हिजो) केन्द्रीय कार्यसमितिको बैठक बोलाएको भन्दै आपत्ति जनाए ।
‘पार्टी केन्द्रीय कार्यसमितिको बैठक कार्यालयमा राख्नु पर्यो नि,’ उनले भने, ‘बूढानीलकण्ठ हामीले नदेखेको हो र भन्या ? उहाँको त्यहाँ घर बन्नुभन्दा अघि नै हामी बूढानीलकण्ठ भगवानको पूजा गर्न जान्थेउँ ।’
यस्तै उनले सभापति देउवाको गृह जिल्ला डडेलधुरामा सम्पन्न भएका वडा तथा पालिका अधिवेशनहरू मान्य नहुने चेतावनीसमेत दिए । उनले सत्ताको दुरुपयोग गरेर पुलिसको घेरामा राखेर डडेलधुरामा गरिएको अधिवेशन मान्न नसकिने अडान राखे ।
नेता सिंहले राजनीतिक न्याय दिन पनि पार्टी नेतृत्वसँग माग गरे ।
