चीनले संसारमा आफ्नो प्रभुत्व कायम गर्नका लागि स्थलसेना, वायुसेना र जलसेना तीनैलाई महाविनाशक हतियारले सुसज्जित गरेको छ । 

अन्तरिक्षबाट हाइपरसोनिक क्षेप्यास्त्र प्रहार गर्न सफलता पाएको पहिलो राष्ट्र चीन नै हो ।

एक ताजा प्रतिवेदनमा चीनले सन् २०२० मा २५० वटा क्षेप्यास्त्र परीक्षण गरेको खुलासा भएको छ । यो संसारभरि गरिएको कुल क्षेप्यास्त्र परीक्षणभन्दा बढी हो । 

चीनले सन् २०३० सम्म एक हजार आणविक बम बनाउने उद्देश्य लिएको छ । बेलायती पत्रिका फाइनान्सियल टाइम्सका अनुसार, चीनले महाविनाशक हतियार बनाएर संसारमा अहिलेसम्मकै ठूलो भूराजनीतिक परिवर्तन ल्याउन खोजेको छ । 

चीनको शक्ति सन्तुलनमा आएको परिवर्तनले अमेरिकाको चिन्ता बढेको छ । चीनसँग अहिले ३०० आणविक बम छ । 

चीनले द्रुत गतिमा लडाकू विमान, बमवर्षक विमान, पनडुब्बी र युद्धपोत बनाएर संसारलाई हतप्रभ पारेको छ । 

यसले दुईवटा प्रश्न जन्माएको छ । पहिलो, चीनको बढ्दो आक्रामक दृष्टिकोणले पूर्वी एसियामा शक्ति सन्तुलन बदल्ने हो ? दोस्रो, हतियारको बलमा चीनले ताइवान हात पार्न सक्ने भएको हो ? 

चीनले एकैपटकमा कैयौं आणविक बम बोक्न सक्ने नयाँ क्षेप्यास्त्रहरू पनि विकसित गरिरहेको छ । अनि ती क्षेप्यास्त्रहरू लुकाउनका लागि उसले सयौं साइलो पनि बनाएको छ । 

त्यसबाहेक चीनसँग अन्तरिक्षमा २०० वटा निगरानी राडार छन् जसले पृथ्वीको कुनाकाप्चा हेरिरहेका छन् । अनि चीनले अमेरिकी वा भारतीय मिसाइलहरू आफूकहाँ आइपुग्नुअघि नै जवाफी आक्रमण गर्ने प्रविधिमा पनि काम गरिरहेको छ । 

चीनको यस तयारीका कारण विश्वभरि अमेरिकाको प्रभुत्व खतरामा परेको छ ।