नेकपा एमालेको अध्यक्षमा उम्मेदवारी दिने घोषणा गरेका नेता भीम रावलले बन्दसत्रमा सम्वोधन गर्दैगर्दा कार्यकर्ताले नाराबाजी गरेका छन् ।

आइतवार राति पौने २ बजेको समयमा रावलले सम्वोधन गरेका थिए । सहमतिको बाधक बनेको भन्दै महाधिवेशनमा सहभागि प्रतिनिधिले रावलविरुद्ध नाराबाजी गरेका हुन् ।

‘प्रक्रियाको कुरा गरेर विपक्षीलाई हँसाउन खोजेको होइन, अधिवेशनका सार्वभौम प्रतिनिधिले चुन्ने र चुनिने अधिकार राख्छौँ । लोकप्रियता परिक्षण गर्न नपाउने प्रणालीमा मेरो सहमति छैन । अध्यक्षको उम्मेदवारको रुपमा जान्छु’ रावलले भनेका थिए । 

रावल बोल्दै गर्दा प्रतिनिधिले बन्दसत्रको हलभित्र नाराबाजी गरेका हुन् । उनीहरुले रावल एक्लैको लागि चुनाव गर्न नसकिने बताएका छन् । 

त्यसअघि बन्दसत्रमा केपी आलीले ३०१ केन्द्रीय सदस्यको सूची पढेर सुनाएका थिए । केन्द्रीय सदस्यको सूची अनुमोदन भएको छ ।