नेकपा एमालेको १४औं महाधिवेशनअन्तर्गत सोमवार बिहानदेखि मनोनयन दर्ता शुरू भएको छ ।

एमाले अध्यक्ष पदमा भीम रावलले उम्मेदवारी दर्ता गराएका छन् । आइतवारै फारम लिएका रावलले सोमवार बिहान निर्वाचन आयोगमा आफ्नो उम्मेदवारी दर्ता गराएका हुन् ।

अन्य पदमा समेत धमाधम उम्मेदवार दर्ता भइरहेको स्रोतले जनाएको छ । ओलीले बन्दसत्र हलमा सार्वजनिक गरेको नामभन्दा बढी उम्मेदवारी परेमा निर्वाचन हुने भएको छ ।

केन्द्रीय निर्वाचन आयोगले संशोधन सहितको कार्यतालिकाअनुसार बिहान ८ बजेदेखि ९ः२० बजेसम्म उम्मेदवारलाई दरखास्त फारम वितरण गरिने र बिहान ९ः३० बजेसम्म उम्मेदवारी दर्ता गरिने छ ।

बिहान १०ः३० बजे उम्मेदवारको प्रारम्भिक नामावली प्रकाशन गरिने निर्वाचन आयोगका प्रमुख विजय सुब्बाले जानकारी दिए । बिहान १०ः३० देखि १०ः४५ बजेसम्म उम्मेदवारको विरोधमा उजुरी दिन सकिनेछ भने १०ः५० बजे उजुरीउपर छानबिन र निर्णय हुनेछ ।

बिहान ११ः५५ देखि १२ बजेसम्म उम्मेदवारलाई उम्मेदवारी फिर्ताको समय दिइनेछ । दिउँसो १२ः५ बजे उम्मेदवारको अन्तिम नामावली प्रकाशन हुने र साँझ ९ बजेदेखि मात्रै मतदान शुरू हुनेछ । मतदानको समय मंगलवार बिहान ३ बजेसम्म तोकिएको छ । मतदान सकिएपछि मतगणना हुनेछ ।

एमालेमा केन्द्रीय समितिदेखि पदाधिकारीसम्म नेतृत्व चयनका लागि सर्वसम्मत प्रयास गर्ने जिम्मा केपी ओलीलाई दिइएको थियो । अध्यक्ष ओलीले आइतवार राति प्रस्तावित पदाधिकारी र केन्द्रीय कमिटीको नाम पेश गरेका छन् ।

उनले १९ पदाधिकारी र ३०१ जना केन्द्रीय सदस्यको नाम पढेर सुनाएका थिए । विगतको केन्द्रीय कमिटीका अधिकांशलाई समेट्दै ओलीले केन्द्रीय सदस्य थप गरेका छन् । उनले प्रस्ताव गरेका नाममा महाधिवेशन प्रतिनिधिले ताली बजाएका थिए । यद्यपि केन्द्रीय सदस्यमा निर्वाचित हुनका लागि निर्वाचनको प्रक्रिया पूरा गर्नुपर्ने हुन्छ ।

एमालेका १९ पदाधिकारीसहित ३०१ सदस्यीय केन्द्रीय कमिटी हुने व्यवस्था रहेको छ ।