०८ असार २०८३, सोमबार
कलाकार सुप्रिया पाण्डेको एकल चित्रकला प्रदर्शनी ‘महिला हिंसाः भ्रूणदेखि घाट सम्म’ बिहीबारदेखि सुरु भएको छ । टिम नेपोको आयोजनामा भएको सो चित्रकला प्रदर्शनी नेपाल आर्ट काउन्सिल बबरमहलमा तीन दिनसम्म चल्नेछ ।
१६ वर्षीया पाण्डेले करिव २ वर्षदेखि ‘महिला हिंसाः भ्रुणदेखि घाटसम्म’ थिममा आर्ट गरेकी थिइन् भने कोरोनाको कारण रोकिएको यस चित्रकला प्रदर्शनीलाई आजदेखि प्रदर्शनमा राखिएको हो । पाण्डे जनस्वास्थ्यविद् डा रवीन्द्र पाण्डेकी छोरी हुन् । सो अवसरमा डा पाण्डेले बालबालिकालाई अभिभावकले पर्याप्त समय दिनुपर्ने र सो क्रममा उनीहरुलाई समाजका बारेमा यथेष्ट जानकारी पनि दिनुपर्ने बताए ।
‘म कामबाट बेलुका फर्किएपछि परिवारसँग नियमित आधा घण्टा गफ गर्छु, जसमा समाजमा घटेको घटनाबारे कुराहरु गर्ने गर्छु । अहिलेको यस कन्सेप्ट पनि त्यही पारिवारिक गफबाट नै सिर्जना भएको हो’, पाण्डेले भने, ‘त्यसैले आफ्नो बालबालिकालाई दिनमा आधा घण्टा भएपनि समय छुट्याएर कुरा गर्ने गरौँ । यसले गर्दा आफ्ना बच्चाहरुले समाजको बारेमा थाहा पाउँछन् भने त्यसबाट उनीहरुलाई सिर्जनशील हुनमा पनि मद्दत मिल्नेछ।’
त्यस्तै कार्यक्रममा कलाकार रसना बज्राचार्यले सुप्रियाको चित्रकलाको तारिफ गरिन् । ‘नेपाल कलाको धनी देश हो र नारीलाई देवीको रुपमा पुज्ने गरिन्छ तर व्यवहारमा भने देखिँदैन । त्यही कुरालाई यति सानो उमेरमा चित्रमार्फत पेस गर्न सक्ने खुबी सुप्रियामा देख्दा खुसी लागेको छ’, उनले भनिन् ।
त्यस्तै नेपाल ललितकला प्रज्ञा प्रतिष्ठानका कुलपति के के कर्माचार्यले १६ वर्षको कलिलो उमेरमा नै महिला हिंसाजस्तो संवेदनशील विषयवस्तु सुप्रियाले चित्रकलामार्फत प्रस्तुत गरेको भन्दै उनको आगामी उज्ज्वल भविष्यको कामना गरे ।
सुप्रियाले एक्काइसौं शताब्दीसम्म आइपुग्दा पनि महिलाहरुले सहनु र भोग्नुपरेका घरेलु तथा सामाजिक हिंसाहरुमा केन्द्रीत रहेर ३० वटा चित्रहरूको प्रदर्शनी गरेकी छिन् । प्रदर्शनीबाट बिक्री भइ संकलित रकम कर्णाली प्रदेशको महिला हिंसाविरुद्धका संघसंस्थाहरुलाई सहयोग स्वरुप दिइने टिमनेपोका अध्यक्ष डा निगम पौडेल जानकारी दिए ।
