नेपाली काँग्रेसको बागमती प्रदेश सभापतिमा शेरबहादुर देउवा पक्षीय इन्द्र बानियाँ विजयी भएका छन् । कृष्ण सिटौला पक्षसमेतको सहयोगमा बानियाँ प्रदेश सभापतिमा विजयी भएका हुन् ।
आइतबार राति सम्पन्न मतगणनाअनुसार सभापतिका प्रत्यासी रामचन्द्र पौडेल पक्षका जगदीश्वरनरसिंह केसी पराजित भएका छन् । विजयी बानियाँले १०८५ मत ल्याए भने पराजित केसीले ९२७ मतमात्र पाए । खसेको २०२५ मतमध्ये १३ मत बदर भएको निर्वाचन समितिले जनाएको छ ।

पहिलो चरणको निर्वाचनमा तीन उम्मेदवारबीच प्रतिस्पर्धा हुँदा कसैको पनि ५० प्रतिशत बढी मत प्राप्त नभएपछि शीर्ष दुई मत ल्याउने केसी र बानियाँबीच दोस्रो चरणमा प्रतिस्पर्धा भएको थियो । पहिलो चरणको मतदानबाट सबैभन्दा कम मत ल्याएका भीमसेन दास प्रधान रिङ आउट भएका थिए ।  सिटौला समूहका उनले त्यसपछि बानियाँलाई समर्थन गरेका थिए ।
आइतबार दिनभर भएको मतदानपछि साँझ ७ बजेबाट मतगणना सुरु भइ पौने १० बजे नतिजा आएको हो  ।