नेकपा मालेका महासचिव सीपी मैनालीले केही अर्ब पैसाका लागि असंलग्नताको नीति नत्याग्न कांग्रेसलाई सुझाव दिएका छन् । 

नेपाली कांग्रेसको १४ औं महाधिवेशन उद्घाटन समारोहमा शुभकामना मन्तव्य राख्दै मैनालीले नामै नलिई एमसीसी अनुमोदन गर्न नहुने बताएका हुन् । 

‘नेपालले असंलग्न परराष्ट्र नीति अनुशरण गर्दै आएको छ, यदी सन्तुलन गुमायौँ भने हिजोको शीतयुद्धमा भन्दा बढी क्षति पुग्नेछ,’ मैनालीले भने, ‘पुरानो पार्टी कांग्रेस जसले झण्डामा राष्ट्रियता लेखेको छ । राष्ट्रियताको विषयमा सम्झौता नगरोस् ।’

मुलुक अप्ठेरोमा परेको बेला कांग्रेसले सही निकास दिनुपर्ने बताए । ‘संसदीय व्यवस्था पटक–पटक असफल भएको छ, सुधारेर ल्याएको संसदीय व्यवस्थाको यो हाल छ । सभामुखले न्याय दिएनन् भनेर प्रतिपक्षी दलले संसद अवरुद्ध गरेको छ,’ मैनालीले भने, ‘यो व्यवस्था तेस्रो पटक ल्यायौँ, अफ्ठेरोमा परेको छ देश, यस्तो बेला कांग्रेसले निकास देओस् ।’