२६ जेठ २०८३, मंगलबार
नेपाली कांग्रेसको नयाँ नेतृत्व चयनका लागि शनिबारदेखि निर्वाचन प्रक्रिया सुरु हुँदैछ । कांग्रेस निर्वाचन समितिले चुनावका जानका लागि महाधिवेशन प्रतिनिधिहरुको अन्तिम नामावली सूची प्रकाशित गरिसकेको छ भने शनिबार बिहान १० देखि साँझ ५ बजेसम्म मनोनयन दर्ताको समय राखेको छ । यस्तै उम्मेदवारी मनोनयन दर्ताउपर दाबी विरोध र जाँचबुझ साँझ ५ देखि ७ बजेसम्म र दाबी विरोधउपर निर्णय साँझ ७ देखि ९ बजेसम्म हुने समितिले जनाएको छ ।
यसैगरी उम्मेदवारको पहिलो नामावली प्रकाशन राति ९ देखि १२ बजेसम्म, मनोनयन पत्र फिर्ता लिइसक्नुपर्ने समय आइतबार बिहान ११ बजेसम्म तोकिएको छ । त्यसपछि उम्मेदवारको अन्तिम नामावली प्रकाशन आइतबार दिउँसो १२ः१५ बजे र मतदान मङ्सिर २७ गते बिहान ८ बजेदेखि सुरु हुनेछ । मतदान सकिएलगत्तै मतगणना सुरु हुनेछ ।
कांग्रेसको सभापतिमा शेरबहादुर देउवा र विमलेन्द्र निधिले उम्मेदवारी घोषणा गरेका छन् भने रामचन्द्र पौडेल पक्ष अझै उम्मेदवारविहीन रहेको छ । पौडेल पक्षमा प्रकाशमान सिंह र डा शेखर कोइरालाले आफ्नो दावी नछाडेपनि सहमति हुन नसकेको हो । आज पनि पौडेल पक्ष बिहानैदेखि छलफलमा रहने बताइएको छ ।
कांग्रेसको १४ औं महाधिवेशनको उद्घाटन शुक्रबार राजधानीको भृकुटीमण्डपमा सुरु भएको थियो भने उद्घाटनसत्र सकिएलगत्तै बन्दसत्र गरिएको थियो ।
बन्दसत्रबाट महामन्त्रीको प्रतिवेदन, केन्द्रीय नीति, अनुसन्धान तथा प्रशिक्षण प्रतिष्ठानको प्रतिवेदन र लेखा समितिको प्रतिवेदन पारित भएको प्रवक्ता विश्वप्रकाश शर्माले जानकारी दिए ।
यसैगरी बन्द सत्रबाट १४औँ महाधिवेशन तयारीका क्रममा कांग्रेस केन्द्रीय कार्यसमितिको निर्णयबमोजिम विधानको विभिन्न धारा उपधारा व्याख्या, वाधा अड्काउ फुकाउ र निलम्वन गर्ने निर्णय अनुमोदन भएको छ ।
कांग्रेस महाधिवेशनमा जम्मा चार हजार ७४३ महाधिवेशन प्रतिनिधि रहेका छन् ।
