०६ साउन २०८३, बुधबार
नेपाली कांग्रेसको भावी सभापतिका उम्मेदवार विमलेन्द्र निधिले सभापतिका लागि दोस्रो चरणमा हुने निर्वाचनमा शेरबहादुर देउवाविरुद्ध मोर्चाबन्दी हुने उद्घोष गरेका छन् ।
महाधिवेशनस्थल भृकुटीमण्डपमा आइतवार पत्रकारहरूसँग कुराकानी गर्दै निधिले पहिलो चरणमा नतिजा नआउने र दोस्रो चरणको निर्वाचनमा शेखर कोइराला, प्रकाशमान सिंह र आफू मिलेर देउवाविरुद्ध मोर्चाबन्दी गर्ने बताएका हुन् ।
कांग्रेस विधानमा सभापतिका कुनै पनि उम्मेदवारले ५० प्रतिशतभन्दा बढी मत ल्याउन नसकेमा बढी मत ल्याउने दुई उम्मेदवारबीच दोस्रो चरणमा प्रतिस्पर्धा हुने व्यवस्था छ ।
'पहिलो चरणमा कसैले ५० प्रतिशत भन्दा बढी मत ल्याउने देखिन्न । दोस्रो चरणमा देउवाइतरका हामीहरू सबै एक हुन्छौं,' निधिले भने ।
कांग्रेसमा देउवाको उत्तराधिकारीका रूपमा चिनिएका निधि अहिले देउवासँग विद्रोह गरेर सभापतिको दौडमा छन् ।
कांग्रेस सभापतिमा देउवा, शेखर, प्रकाशमान, विमलेन्द्र र कल्याण गुरुङ गरी ५ जनाले उम्मेदवारी दिएका छन् ।
देउवा र कोइरालाले प्यानलसहित उम्मेदवारी दर्ता गराएका छन् ।
कोइराला संस्थापनइतरको आधिकारिक उम्मेदवार भएकाले चुनाव दोस्रो चरणमा गएको खण्डमा देउवा र कोइरालाबीच प्रतिस्पर्धा हुने सम्भावना छ ।
