०८ साउन २०८३, शुक्रबार
नेपाली कांग्रेसको सभापति चयनका लागि दोस्रो चरणमा हुने निर्वाचनमा प्रकाशमान सिंहले शेरबहादुर देउवालाई सघाउने भएका छन् ।
प्रकाशमानको निवास चाक्सीबारीमा भएको भेटमा प्रकाशमानले देउवालाई सघाउने सहमति गरेका हुन् ।
आफूहरूले नेतृत्व परिवर्तनको कुरा गरे पनि देशभरका महाधिवेशन प्रतिनिधिहरूको मत देउवाको पक्षमा रहेको पाइएकाले उनलाई सघाउने निर्णय भएको सिंहले बताए ।
देउवाले कमी कमजोरीलाई सुधारेर अघि बढ्ने वचन दिएको उनले बताए ।
सभापति चयनका लागि दोस्रो चरणको मतदान मंगलवार साढे ३ बजेदेखि शुरू हुने कार्यक्रम छ ।
पहिलो चरणमा सभापतिका उम्मेदवार कसैले पनि स्पष्ट बहुमत अर्थात् ५० प्रतिशतभन्दा धेरै मत ल्याउन नसकेपछि निर्वाचन दोस्रो चरणमा धकेलिएको हो ।
मतदानको अवधि साढे ७ बजेसम्मका लागि तोकिएको छ ।
पहिलो चरणमा प्रधानमन्त्री एवं निवर्तमान सभापति शेरबहादुर देउवाले २२५८ मत प्राप्त गरेका थिए । सभापतिका अर्का प्रत्यासी डा. शेखर कोइरालाले १७०२ मत प्राप्त गरे ।
प्रकाशमान सिंहले ३७१ र विमलेन्द्र निधिले २५० मत प्राप्त गरे । सभापतिका पाँचौं प्रत्यासी कल्याण गुरुङले भने २२ मत मात्रै प्राप्त गरे ।
अब धेरै मत ल्याउने देउवा र कोइरालाबीच दोस्रो चरणको प्रतिस्पर्धा हुनेछ ।
सोमवार मध्यरातसम्म चलेको मतदानमा ४ हजार ७४३ मध्ये ४ हजार ६७९ जनाले मतदान गरेका थिए ।
सभापतिको मतगणना गरेपछि मात्र अन्य पदाधिकारी र केन्द्रीय सदस्यको मतगणना हुनेछ ।
