०३ असार २०८३, बुधबार
चीनले संसारभरि सैन्य अड्डा बनाइरहेको वा त्यसका लागि कोशिश गरिरहेको अमेरिकाको रक्षा मन्त्रालयले दाबी गरेको छ ।
जलसेना, वायुसेना र स्थलसेनाको सहायताका लागि अतिरिक्त सुविधा पनि चीनले उपलब्ध गराइरहेको अमेरिकी रक्षा मन्त्रालयको भनाइ छ ।
चिनियाँ जनमुक्ति सेना संसारको सबभन्दा ठूलो सेना हो । त्यसमा लगभग २० लाख सैनिकहरू छन् ।
सी चिनपिङ सत्तामा आएदेखि चिनियाँ सेना थप आक्रामक भएको छ । उसको महत्त्वाकांक्षा पनि बढेको छ ।
इक्वेटोरियल गिनी र संयुक्त अरब अमिरातमा चीनले सैन्य अड्डा बनाउन खोजेको रिपोर्ट हालैका दिनमा आएको थियो ।
इक्वेटोरियल गिनीमा चीनले सैन्य अड्डा बनाएमा अमेरिकाको ईस्टर्न सीबोर्डलाई खतरा हुने अमेरिकाले बताएको थियो । अफ्रिका कमान्डका कमान्डर जनरल स्टिफन टाउनसेन्डले एटलान्टिक महासागरको तटमा चीनले जलसेनाका लागि अड्डा बनाउन लागेको बताए ।
यसअघि अमेरिकाबाट चेतावनी पाएपछि अबु धाबीबाट ८० किलोमिटर उत्तरमा रहेको खलीफा कार्गो बन्दरगाहमा चीनले निर्माण कार्य बन्द गरेको थियो । यूएईलाई खबर नगरिकन गोप्य तरिकाले चीनले सैन्य अड्डा बनाएको आरोप लागेको थियो ।
सन् २०१८ मा यूएई र चीनबीच कोस्को शिपिङ पोर्ट अबु धाबी टर्मिनललाई अप्ग्रेड गर्ने सम्झौता भएको थियो । यी बन्दरगाहहरू अल दफरा एयरबेस र जेबल अली दुवै नजिक छ ।
चीनले कम्बोडियामा पनि सैन्य अड्डा बनाउन लागेको बताइएको छ । हालै कम्बोडियाले रीम नेभल बेसमा अमेरिकाले बनाएको दुई भवन ध्वस्त पारेको थियो । पछि कम्बोडियाका रक्षामन्त्रीले यसको पुष्टि गर्दै चीनले आधारभूत संरचनाको विस्तारमा सहयोग गरिरहेको बताए ।
द वा स्ट्रीट जर्नलले समाचारमा चीनलाई जलसैन्य सुविधा उपलब्ध गराउन कम्बोडियाले ३० वर्षको सहमति गरेको उल्लेख गरेको थियो । तर कम्बोडिया सरकारले त्यसको खण्डन गरेको थियो ।
