भारतका स्थलसेना प्रमुख मनोज मुकुन्द नरवणेले चीफ अफ स्टाफ कमिटीको अध्यक्षको पदभार सम्हालेका छन् ।

उक्त कमिटीमा तीनै सेनाका प्रमुख रहन्छन् । 

गत ८ डिसेम्बरमा हेलिकप्टर दुर्घटनामा रक्षाअध्यक्ष अर्थात् चीफ अफ डिफेन्स स्टाफ जनरल बिपिन रावतको निधनपछि यो पद खाली थियो । 

जनरल नरवणे सेनाका सबभन्दा वरिष्ठ अधिकारी भएकाले उनलाई कमिटीको अध्यक्ष बनाइएको हो । सीडीएस पद सिर्जना हुनुअघि तीनै सेनाका प्रमुखहरूमध्ये सबभन्दा वरिष्ठलाई चीफ अफ स्टाफ कमिटीको अध्यक्ष बनाइन्छ । 

वायुसेना प्रमुख एयर चीफ मार्शल भी आर चौधरी र जलसेना प्रमुख आर हरि कुमार नरवणेभन्दा जुनियर छन् । 

लद्दाखमा गतिरोधको व्यवस्थापन गरेसँगै समग्र प्रदर्शन राम्रो गरेको आधारमा जनरल नरवणेलाई सीडीएसमा नियुक्त गर्न सकिन्छ । त्यसै पनि उनी तीनै सेनाप्रमुखमध्ये सबभन्दा वरिष्ठ हुन् । 

जनरल नरवणे सन् २०१९ को डिसेम्बर ३१ मा सेनाप्रमुख बनेका थिए । उनी अप्रिल महिनामा रिटायर हुँदैछन् ।