२१ जेठ २०८३, बिहीबार
भारत सरकारले युवतीको बिहे गर्ने न्युनतम उमेर १८ वर्षबाट बढाएर २१ वर्ष पुर्याएको छ ।
यससँगै भारतमा पुरुष र महिलाको विवाह गर्ने उमेर समान भएको छ । सरकारले प्रचलित कानूनमा संशोधन गरेर युवतीको विवाह गर्ने न्युनतम उमेरलाई बढाउने प्रस्तावलाई मन्जुरी दिएको छ ।
सरकारले युवतीको विवाह लगायत विषयमा अध्ययन गर्न सन् २०२० जुनमा समता पार्टीकी पूर्व अध्यक्ष जया जेटलीको नेतृत्वमा टास्क फोर्स बनाएको थियो । जसमा नीति आयोगका सदस्य डा. वीके पाल समेत सहभागी थिए ।
टास्क फोर्सले गत महिना प्रधानमन्त्री नरेन्द्र मोदीलाई रिपोर्ट बुझाएको छ । समितिले युवतीको विवाहको न्युनतम उमेर २१ वर्ष गर्न सुझाव दिएको छ । देशभरका १६ विश्वविद्यालयका युवाको सुझावका आधारमा युवतीको विवाहको न्युनतम उमेर बढाइएको भारतीय सञ्चारमाध्यमले जनाएका छन् ।
युवतीले ढिलो विवाह गर्दा परिवार, महिला, बच्चा र समाजलाई सकारात्मक आर्थिक र सामाजिक प्रभाव पर्ने रिपोर्टमा उल्लेख छ ।
विवाहको उमेर बढाउने कानूनलाई रातारात लागू गर्न नसकिने सुझाव समेत दिइएको छ । विवाहको उमेर बढाउने विषयमा प्रदेश सरकारहरूलाई पर्याप्त समय दिएर कार्यान्वयनमा लैजानुपर्ने रिपोर्टमा उल्लेख छ ।
