०२ साउन २०८३, शनिबार
नेपाल मजदूर किसान पार्टीका सांसद प्रेम सुवालले संविधान संशोधन गरेर मृत्युदण्डसम्बन्धी कानून ल्याउन माग गरेका छन् ।
बुधवार प्रतिनिधि सभा बैठकमा तेजाव तथा अन्य घातक रासायनिक पदार्थ नियमन सम्बन्धी अध्यादेश, २०७८ माथि विरोधको सूचना पेश गर्ने क्रममा सुवालले मृत्युदण्डको कानून ल्याउन माग गरेका हुन् ।
‘तेजाबलगायत घातक रसायनिक पदार्थ नियमनका लागि संविधान संशोधन गरी मृत्युदण्डको कानून आउन जरुरी छ,’ उनले भने । नेपालको संविधानले मृत्युदण्डसम्बन्धी कानून बनाउन प्रतिबन्ध लगाएको छ ।
विरोधको सूचनामाथि गृहमन्त्रीको तर्फबाट जवाफ दिँदै सञ्चार मन्त्री ज्ञानेन्द्रबहादुर कार्कीले तेजाबजस्ता रासायनिक पदार्थ नियमनका लागि तुरुन्तै कानून कार्यान्वयनमा ल्याउनु परेकाले अध्यादेश ल्याउनुपरेको भन्दै विरोधको सूचना फिर्ता गर्न माग गरे ।
अध्यादेशमार्फत नेपालमा तेजाबलगायत अन्य रासायनिक पदार्थको आयात र बिक्रीका लागि अनुमति पत्र लिनुपर्ने व्यवस्था गर्न लागिएको उनले बताए ।
