२९ असार २०८३, सोमबार
दक्षिण अफ्रिकामा रंगभेदी शासन अन्त्य गराउनका लागि महत्त्वपूर्ण भूमिका निर्वाह गरेका नोबेल शान्ति पुरस्कार विजेता आर्कबिशप डेस्मन्ड टुटुको ९० वर्षको उमेरमा देहान्त भएको छ ।
महान् दक्षिण अफ्रिकीहरूको पुस्ताका अर्का एक व्यक्तित्वलाई गुमाउनुपरेको राष्ट्रपति सिरील रामाफोसाले बताए ।
टुटु दक्षिण अफ्रिकाका सर्वाधिक चर्चित व्यक्तिमध्ये एक थिए ।
रंगभेदविरुद्धको आन्दोलनका नेता नेल्सन मन्डेलाका समकालीन टुटु सन् १९४८ देखि १९९१ सम्म अल्पसंख्यक गोरा शासकहरूले चलाएको रंगभेदी नीतिको विरोध गर्थे ।
उनले रंगभेदी शासन प्रणालीलाई अन्त्य गर्नका लागि खेलेको भूमिकाका लागि सन् १९८४ मा नोबेल शान्ति पुरस्कार पाएका थिए ।
सन् १९६० मा पादरी बनेका टुटु सन् १९७६ देखि १९७८ सम्म लेसोथोको बिशप बनेका थिए । सन् १९८५ मा उनी जोहानेसबर्गमा बिशप थिए । केपटाउनका उनी पहिलो काला जातिका आर्कबिशप थिए ।
आफ्नो उच्च दर्जालाई उनले देशमा काला जातिका मानिसमाथि हुने दमनका विरुद्ध बोल्नका लागि उपयोग गर्ने गरेका थिए । आफ्नो उद्देश्य राजनीतिक नभई धार्मिक रहेको उनी बताउँथे ।
