जनता समाजवादी पार्टीका अध्यक्ष उपेन्द्र यादवले माओवादी जनयुद्ध र मधेश विद्रोहकै जगमा वर्तमान राजनीतिक परिवर्तन सम्भव भएको बताएका छन् ।

नेकपा माओवादी केन्द्रको आठौं महाधिवेशन उद्घाटन समारोहलाई आइतवार प्रज्ञा भवनमा सम्बोधन गर्दै यादवले आफूहरू सँगै लडेको पुराना दिन पनि सम्झिए ।

'जनयुद्धका विभिन्न मोर्चामा सँगै लडेको सम्झना अहिले पनि भइरहेको छ,' यादवले भने, 'माओवादी जनयुद्ध र मधेश विद्रोह नभएको भए मुलुक संघीय लोकतान्त्रिक गणतन्त्र हुने थिएन । देश राजतन्त्रकै वरिपरि घुमिरहेको हुन्थ्यो ।'

उनले सत्य निरुपण तथा मेलमिलापको विषय अहिले पनि अलपत्र रहेको भन्दै जनयुद्ध र विद्रोहमा लागेकाहरूलाई न्याय दिलाउन प्रचण्डको ध्यानाकर्षण गराए ।

उनले संविधानमा सबैको अपनत्व हुने वातावरण बनाउन मञ्चमै रहेका प्रधानमन्त्री शेरबहादुर देउवासहित सत्ता गठबन्धनका नेताहरूको ध्यानाकर्षण गराए ।

उनले संसद् अवरुद्ध गराएर केही प्राप्त नहुने भन्दै एमाले महासचिव शंकर पोखरेलले ध्यानाकर्षण गराए ।

'संसद् अवरुद्ध गर्ने कमरेड यहीँ हुनुहुन्छ । माधव नेपाल संसदमा भएर अवरुद्ध गरेको भन्नुहुन्छ, माधवजी पनि यहीँ हुनुहुन्छ, उहाँहरू पनि यहीँ हुनुहुन्छ । घर काठमाडौंमै छ । दुवैले कम्युनिस्ट झण्डा हल्लाइरहनुभएकै छ,' यादवले भने, 'संसद् अवरुद्ध गरेर केही उपलब्धि हुँदैन ।'