२३ जेठ २०८३, शनिबार
नेकपा माओवादी केन्द्रको आठौं राष्ट्रिय महाधिवेशनले पार्टी केन्द्रीय कमिटी पदाधिकारीको टुंगो लगाउन सकेको छैन ।
पार्टी स्थायी कमिटी सदस्य देव गुरूङले पेश गरेको विधान संशोधन प्रस्तावमा १५ पदाधिकारीसहित २९९ जना सदस्य रहेको केन्द्रीय कमिटी निर्वाचित गर्ने प्रस्ताव गरेको थियो ।
महाधिवेशनको बन्दसत्रले विधान संशोधन प्रस्ताव पारित गरेको भए पनि पदाधिकारीको संख्या तोक्ने जिम्मा भने केन्द्रीय कमिटीलाई नै दिएको छ ।
त्यसो हुँदा अब महाधिवेशनबाट अध्यक्ष र केन्द्रीय सदस्य मात्रै निर्वाचित हुने भएका छन् ।
गुरूङले ल्याएको विधान संशोधन प्रस्तावमा अध्यक्ष-१, वरिष्ठ उपाध्यक्ष-१, उपाध्यक्ष-६, महासचिव-१, उपमहासचिव-२, सचिव-३ र कोषाध्यक्ष-१ गरी १५ सदस्यीय पदाधिकारी हुने भनिएको थियो ।
अब सोही प्रस्ताव कार्यान्वयन गर्ने वा नयाँ संरचना बनाउने भन्नेबारे केन्द्रीय कमिटीले टुंगो लगाउने भएको छ ।
यस माओवादी केन्द्रले २०७१ मा विराटनगर सम्मेलनबाट पार्टीलाई बहुपदीय प्रणालीमा लैजाने निर्णय गरेर पदाधिकारी चयन गर्ने जिम्मा केन्द्रीय कमिटीलाई दिएको थियो । त्यसबेला प्रचण्डले प्रस्ताव गरेको ९९ सदस्यीय केन्द्रीय कमिटी अनुमोदन गरेर सम्मेलन समापन भएको थियो ।
माओवादी केन्द्रको आठौं महाधिवेशनमा पनि ठ्याक्कै त्यही अवस्था दोहोरिएको छ ।
अध्यक्षले प्रस्ताव गर्ने २९९ सदस्यीय केन्द्रीय कमिटी अनुमोदन गरेर महाधिवेशन समापन हुने भएको छ ।
पार्टीको पदाधिकारी भने केन्द्रीय कमिटीको आगामी बैठकले तय गर्ने भएको छ । त्यसो हुँदा नेतृत्वलाई अनुकुल हुने गरी पदाधिकारीको संख्या तोक्न र नेतृत्वले चाहेको व्यक्ति स्थापित गर्न सहयोग पुग्नेछ ।
