०२ असार २०८३, मंगलबार
तनहुँको व्यास नगरपालिका–११ तनहुँसुरस्थित सूर्योदय प्राथमिक विद्यालयमा अध्ययनरत चेपाङ विद्यार्थीलाई लायन्स क्लब अफ तनहुँ दमौलीले न्यानो कपडा सहयोग गरेको छ ।
विद्यालयमै पुगी क्लबले मंगलवार विपन्न चेपाङ बालबालिकालाई न्यानो कपडा सहयोग गरेको हो ।
न्यानो कपडाको अभावमा जाडो महिनामा काम्दै विद्यालय आउने गरेको थाहा पाएपछि क्लबले ३० चेपाङ बालबालिकालाई स्वेटर र टोपी सहयोग गरेको क्लबका निवर्तमान अध्यक्ष एवं लायन्स क्लब ३२५ वी १ नेपालका डिस्ट्रिक्ट चियरपर्सन सरोज भण्डारीले जानकारी दिए ।
‘चेपाङ बस्तीका बालबालिकाको अवस्था दयनीय छ, उनीहरूलाई थप सहयोगको खाँचो देखिएको छ,’ उनले भने, ‘खुट्टामा चप्पल छैन, च्यातिएकै कपडा लगाउन बाध्य छन् ।’
चेपाङ बालबालिकाको अवस्था ज्यादै दयनीय रहेको र आगामी दिनमा समेत सहयोग गर्ने क्लबका अध्यक्ष राजु रानाले जानकारी दिए । ‘न्यानो कपडा नहुँदा कतिपय विद्यार्थी विद्यालयमा नियमित पनि नभएको पायौं, न्यानो कपडा पाएपछि नियमित विद्यालय आउने वातावरण बनाउन सकिन्छ भन्ने आशा पलाएको छ,’ उनले भने ।
लायन्स क्लब अफ तनहुँ दमौलीले विपन्न वर्गलाई निःशुल्क कपडा सहयोग गर्दै आएको छ । त्यसका लागि क्लबले दमौली बजारमा कपडा बैंक नै खोलेको छ । कपडा बैंकबाट आवश्यक हुनेले कपडा लैजान सक्ने उनले बताए ।
कपडा बैंकको दीगोपनाका लागि रकम संकलन गर्ने उद्देश्यसहित क्लबले अंग्रेजी नयाँ वर्षमा सांगीतिक कार्यक्रम आयोजना गरेको थियो ।
