०४ साउन २०८३, सोमबार
विभिन्न ११ सूत्रीय माग राख्दै सीके राउत नेतृत्वको जनमत पार्टीले शुक्रवार रूपन्देहीले भैरहवामा प्रदर्शन गरेको छ ।
प्रदर्शनकारीले किसान माथिको दमन बन्द गर, किसान र आन्दोलनकारीमाथि लगाइएका झूटा मुद्दा फिर्ता गर, समयमा मलखाद र बीउबिजनको व्यवस्था गर, सिँचाइको व्यवस्था गर भन्दै सरकारविरूद्ध नाराबाजी गरेका छन् ।
पार्टीका केन्द्रीय सचिव भुपेन्द्र यादवले सरकारले किसानको माग नसुनेको बताए । किसानका सानाभन्दा साना मागहरू पनि सरकारले सम्बोधन गर्न नचाहेको उनले बताए ।
आफ्नै देशमा खेती गर्नका लागि पनि सरकारसँग मलबीउ माग्दै आन्दोलन गर्नुपर्ने बाध्यता रहेको उनले बताए । सरकार ठूला–ठूला भष्टाचारमा संलग्न रहेको बताउँदै आपसमा मिलेर सरकार चलाउने तर किसानलाई हेर्ने दृष्टिकोण सबै पार्टीहरूको गलत रहेको बताए ।
प्रदर्शनकारीले स्थानीय तहमा भएका चरम भ्रष्टाचारको छानबिन गरी दोषीलाई जेल चलान गर्नुपर्ने, किसानका लागि कृषि बीमा लागू गर्नुपर्ने लगायतका ११ सूत्रीय माग राखेका छन् ।
