मधेश प्रदेश नामकरण गरिएकोमा असहमति जनाउँदै जनकपुरका युवाहरूले प्रदेश सांसदहरूको पुत्ला जलाएका छन् । 

२२ जिल्लालाई समेटेर मात्रै मधेश प्रदेश बनाउनुपर्नेमा अन्यथा भएको भन्दै उनीहरूले त्यसको विरोधमा मंगलवार बिहानै जनकपुरको जानकी चोकमा प्रदेश सांसदहरूको पुत्ला दोहन गरेका हुनु ।

आठ जिल्लाको मिथिला र भोजपुराको पहिचानलाई समाप्त हुने गरी मधेश प्रदेश बनाएकाले त्यसको विरोधमा प्रदर्शन गर्नुपरेको युवा सुशील कर्णले बताए । उनले २२ जिल्लालाई मधेश प्रदेश बनाउनुपर्ने मागसहित मधेश आन्दोलन भएको उल्लेख गर्दै ८ जिल्लालाई मात्रै समेटिएर बनाइएको मधेश प्रदेश मान्य नहुने चेतावनी समेत दिए । 

त्यसक्रममा उनीहरुले मधेशी जनताको पहिचानमाथि नै खेलबाड गर्ने कार्य मधेश केन्द्रित दलहरूबाट भएको आरोपसमेत लगाएका छन् । पुत्ला दहन गरिरहँदा युवाहरूले ‘प्रदेश सांसद मुर्दावाद’, ‘८ जिल्लालाई मात्रै मधेश प्रदेश मान्दैनौं’, ‘पहिचानसहितको मिथिला–भोजपुरा प्रदेश नामाकरण गर’ लगायतका नारा लगाएका थिए ।

यता प्रदेशको नामकरण मधेश प्रदेश र राजधानी जनकपुर भएको खुशीयालीमा मंगलवार (आज) सार्वजनिक बिदा दिइएको छ । त्यसैगरी मधेश सरकारले बलिदानी दिवसको अवसरमा बुधवार पनि प्रदेशमा सार्वजनिक बिदा दिएको छ ।

मधेश सरकारले प्रत्येक वर्ष माघ ५ गते बलिदानी दिवस मनाउँदै आएको छ । 

सोमवार प्रदेश सभामा भएको गोप्य मतदानपश्चात् प्रदेशको नाम मधेश प्रदेश र स्थायी राजधानी जनकपुरधाम कायम भएको हो ।