निक्षेप घट्न थालेपछि वाणिज्य बैंकहरूले कर्जा विस्तार रोकेका छन् । माघ पहिलो साता वाणिज्य बैंकहरूको निक्षेप १३ अर्ब रुपैयाँले घटेको छ । 

नेपाल बैंकर्स संघले उपलब्ध गराएको माघ ७ गतेसम्मको तथ्यांकअनुसार वाणिज्य बैंकहरूको निक्षेप ४३ खर्ब ११ अर्ब रुपैयाँ रहेको छ । यस्तो निक्षेप अघिल्लो साता अर्थात पुस मसान्तसम्ममा ४३ खर्ब २४ अर्ब रुपैयाँ रहेको थियो  । 

यो अवधिमा वाणिज्य बैंकहरूको कर्जा प्रवाह करीब ठप्प छ । सञ्चालनमा रहेका २७ वटा वाणिज्य बैंकहरूले एक सातामा जम्मा एक अर्ब रुपैयाँमात्रै कर्जा विस्तार गरेका छन् ।

यो अवधिमा बैंकहरूको कर्जा विस्तार ४१ खर्ब ४३ अर्बबाट ४१ खर्ब ४४ अर्ब रुपैयाँ पुगेको छ ।

कर्जा विस्तार घट्नुको कारण अधिकांश बैंकको कर्जा निक्षेप अनुपात (सीडी रेसियो) तोकिएको सीमाभन्दा माथि पुग्नुलाई मानिएको छ ।

माघ पहिलो साता वाणिज्य बैंकहरूको औसत सीडी रेसियो ९०.४३ प्रतिशत रहेको छ । राष्ट्र बैंकले असार मसान्तको समय दिएर वाणिज्य बैंकहरूलाई सीडी रेसियो ९० प्रतिशतभित्रै राख्न निर्देश दिएको छ ।

मंगलवारसम्ममा १५ वटा वाणिज्य बैंकको सीडी रेसियो तोकिएको सीमा ९० प्रतिशतभन्दा बढी रहेको नेपाल राष्ट्र बैंकले जानकारी दिएको छ ।  

राष्ट्र बैंकका अनुसार सीडी रेसियो सीमाभन्दा माथि गएकाले घटाउनुपर्ने र कर्जा विस्तार क्षमताभन्दा बढी भइसकेकाले पनि कर्जा प्रवाह रोकिएको बैंकर्सहरू बताउँछन् ।