चीनको लडाकू विमान जे–१० को नयाँ संस्करण जे–१०सी पाकिस्तानमा छिट्टै आइपुग्ने खबर छ । 

चीनका यी २५ वटा विमानले मार्च २३ मा पाकिस्तान डेको परेडमा फ्लाईपास्ट गर्ने बताइएको छ । सिंगल इन्जिन लडाकू विमानहरूलाई पाकिस्तान वायुसेनाको आधुनिकीकरणका लागि ल्याइएको हो । 

पहिलोपटक यो विमान चीनबाहिर बेच्न लागिएको हो । चीनको सिचुआन प्रान्तमा रहेको छङ्तु एयरक्राफ्ट कर्पोरेसनको कारखानामा विमान बनाइएको हो । 

चीनले रुसी इन्जिनमा निर्भरता घटाउनका लागि धेरै प्रयास गरिरहेको छ । जे–१० मा चीनमै बनेको डब्ल्यूएस–१०बी ताइहाङ इन्जिन जडान गरिएको छ । पहिलेका जे–१०ए र जे–१०बी संस्करणहरूमा रुसको एएल–३१एफ इन्जिन जडान गरिएको थियो । 

पाकिस्तानले किनेको जे–१०सी विमान देशमा भित्र्याउन लामो समय लाग्दैन किनकि त्यसको इन्जिन ट्रान्सफरका लागि मस्कोको स्वीकृति अनिवार्य छैन । 

भारतले फ्रान्ससँग राफेल विमान किनेपछि पाकिस्तानले पनि आफ्नो वायुसेनालाई बलियो बनाउने कोशिश गरिरहेको छ । पाकिस्तानसँग अहिले नै रहेको जेएफ–१७ लडाकू विमानहरूमा यी नयाँ विमान थपिनेछन् ।