महानगरीय प्रहरी अपराध महाशाखाले ठूलो परिमाणमा अखाद्य बिस्कुट बरामद गरेको छ । 

ललितपुरको सुनाकोठीबाट स्पर्श फुड प्रोडक्ट एण्ड प्याकेजिङ कम्पनीले बिक्री गर्ने गरेको बिस्कुट बरामद गरेको महाशाखाका प्रवक्ता एसपी कृष्ण कोइरालाले जानकारी दिए । 

यसअघि पनि अखाद्य वस्तु मिसाएर बिक्री गरेको स्पर्श महसहित सञ्चालक ४४ वर्षीय नरबहादुर श्रेष्ठलाई प्रहरीले पक्राउ गरेको थियो । 

सोमवार उनैले सञ्चालन गरेको फ्याक्ट्रीमा पुरानो बिस्कुटलाई पिसेर पुनः नयाँ बनाई बिक्री गर्ने गरेको पाइएको प्रहरीले जनाएको छ । 

उनको धन्दा देख्दा छापा मार्न पुगेका प्रहरी अधिकृतहरू नै चकित परेका थिए ।

एसपी कोइरालाका अनुसार उनीहरूले ३ वर्ष पुराना कुकिजहरूलाई पुनः बटर चकलेट, काजु कुकिज बनाई बिक्री गर्दै आएका थिए ।

मिति गुज्रेको पाउरोटीलाई समेत चिकेन रोष्ट बनाउन प्रयोग गर्ने गरेको खुलेको छ । 

प्रहरीले खाद्य तथा गुण नियन्त्रण विभागको उपस्थितिमा फ्याक्ट्रीलाई सिल गरेको छ ।

भेनेगर ५४ कार्टुन, चिनी ३० र्काटुन, अजिना मोटो ३८५ बोरालगायतका सामानहरू बरामद गरिएको प्रहरीको भनाइ छ । 

माघ ७ गते ७६ सय केजी नक्कली मह बनाउने कच्चा पदार्थसहित श्रेष्ठ पक्राउ परेका थिए ।