नेपाली कांग्रेसका महामन्त्री गगन थापाले सत्ता गठबन्धनबाट अब पार नलाग्ने निष्कर्ष पुगेको बताएका छन् ।

संसद् भवन नयाँ बानेश्वरमा सत्तारुढ कांग्रेस र प्रमुख प्रतिपक्षी एमालेबीचको छलफलबाट बाहिरिने क्रममा थापाले एमसीसीको बारेमा गठबन्धनका दल एक ठाउँमा नरहेकाले गठबन्धनबाट पार नलाग्ने निष्कर्षमा आफूहरू पुगेको बताएका हुन् ।

छलफलमा प्रधानमन्त्री एवं कांग्रेस सभापति शेरबहादुर देउवाले एमालेकै सरकारको पालामा एमसीसी अघि बढेकाले त्यसलाई अनुमोदन गर्न सघाउन एमाले अध्यक्ष केपी शर्मा ओलीलाई आग्रह गरेको थापाले बताए । 

‘अहिलेको अवस्थामा अहिलेको सरकार र भविष्यको सरकारको अंक गणित महत्त्वको विषय भएन । एमसीसी अनुमोदन गराउन प्रमुख प्रतिपक्षी दलसँग सबै विषयमा छलफल गर्न तयार छौं । यो देशकै प्रतिष्ठाको विषय हो । यसलाई पास गरौं भनेर आग्रह गर्नुभयो’, थापाले भने । 

एमाले अध्यक्ष ओलीले पार्टीमा साथीहरूसँग छलफल गरेर जवाफ दिने बताएको थापाले जानकारी दिए ।

साँझ ७ बजे बालुवाटारमा पुनः छलफल हुने उनले बताए ।